Xipano xa GGM xitisa kucinca eka Mintlangu IMSSA

Hi Orlando Chauke

Swipano swa mintlangu swa Masipala wa Greater Giyani, leswi nga nghenelela eka mintlangu yo hlaya hi nkarhi mimphikizano ya Inter-Municipal Sports of South Africa (IMSSA) leyi khomeriweke eDorobeni ra Buffalo, Eastern Cape, swi endlile vukona bya swona byi vonaka hambileswi swi nga hlulangiki.

Xiendlakalo lexi xi nyikile timasipala ku suka etikweni hinkwaro nkarhi wo kombisa vutshila byo hambana na titalenta eka mintlangu yo hambana hi xikongomelo xo tlakusa vuhlayiseki na rihanyo exikarhi ka vatirhi.

Xipano xa GGM a xi vumbiwa hi vatlangi va netball, bolo ya milenge, vo phasa tinhlampfi, vo hoxa miseve, aerobics na snooker.

Exikarhi ka leswi, ku vuriwa leswaku xipano xa netball xi fikelele ku humelela loku xiyekaka, tani hi leswi xi koteke ku ya eka xiyimo xa vu 8 xi nga si humesiwa. Ku vuriwa leswaku matirhelo ya vona ya kombisile ku tiyimisela ka vona eka mphikizano.

“Leswi a ku ri ku humelela lokukulu, ngopfungopfu tanihi leswi a ku ri vona ntsena xipano xo huma eLimpopo lexi koteke ku fikelela xiteji xexo xa mphikizano,” ku hlamusela Steve Mavunda, muvulavuleri wa masipala.

“Khombo ra kona, va huriwile eka ti ‘quarterfinal’, laha a va langutane na ntlangu wo tika na Masipala wa Mahikeng, va hluriwile hi 26-14,” u ye emahlweni, a engetela leswaku, hambi leswi va nga lahlekeriwa, matirhelo ya vona ya kombisile matimba na vuswikoti bya vatlangi va vona va netball.

Hi nkarhi lowu fanaka, xipano xa bolo ya milenge xa vavanuna a xi fikanga eka xiyimo xa le henhla xa vu 8, tani hi leswi xi nga humesiwa eka xiyimo xa vu 16 endzhaku ko hluriwa hi 5-4 hi Masipala wa Thulamela hi ti penati. Leswi swi tile endzhaku ko tlanga hi 0-0 erivaleni, laha ku nga riki na xipano lexi koteke ku howisa goli.

“A va ri ekusuhi no fikelela xiyimo xa vu 8. Loko a va hlule ti penati teto, a va ta va va fikelele eka xiyimo xa le henhla xa vu 8,” ku vula Mavunda, a engetela leswaku xipano xa vaphasi va tihlampfi xi vile na matirhelo yo biha swinene eka swipano hinkwaswo leswi yimelaka GGM. Hambi leswi va nga endla matshalatshala, ku vuriwa leswaku va tsandzekile ku phasa hambi nhlampfi yin’we.

“Xivangelo xa vona a ku ri leswaku a va nga tolovelanga ku phasa tinhlampfi elwandle. Vunyingi bya vona a va nga si tshama va phasa tinhlampfi elwandle, kutani swi ve ntlhontlho lowukulu eka vona ku phikizana ehansi ka swiyimo sweswo.

“Va tlhela va kombisa leswaku, eka timasipala hinkwato ta le Xifundzhenintsongo xa Mopani leti nga nghenela xiyenge xa ku phasa tihlampfi, i masipala wa Phalaborwa ntsena lowu koteke ku phasa nhlampfi yin’we, kasi timasipala tin’wana, ku katsa na Giyani, ti humile na tanda,” ku vula yena.

Mavunda u vule leswaku mbuyelo wa swiyenge leswi nga sala wu ta tivisiwa hi nkarhi lowu faneleke. “A hi na vuxokoxoko bya leswaku swipano leswi humaka eka swiyenge swin’wana swi tirhile njhani tanihi leswi mbuyelo wu nga si tivisiwaka,” u vurile, a engetela leswaku u langutele leswaku mbuyelo wu ta tivisiwa ku nga ri khale.