Hosi Ishmael Maswanganyi wa muganga wa Maswanganyi eGiyani u komberile vavekisi ku vekisa eka ndhawu ya yena ku pfuneta ku tlakusa migingiriko ya ikhonomi na ku tumbuluxa swivandlanene swa mitirho eka vanhu va yena.
Loko a vulavula hi nkarhi wa xiendlakalo xo tlangela Siku ra Maswanganyi lexi khomeriweke emugangeni wa ka vona hi Ravuntlhanu vhiki leri hundzeke, Hosi Maswanganyi u fanise ku va na misava leyi nga tirhisiwiki na “ku tshama ehenhla ka nsuku lowu nga kotiki ku lulamisiwa hikwalaho ka ku pfumaleka ka switirhisiwa” naswona u komberile lava nga ta va vavekisi ku nghenelela no pfuneta.
Hosi Ishmael Maswanganyi a vulavula hi nkarhi wa Siku ra Maswanganyi
“Loko ndzi ku vavekisi, ndzi vulavula hi vanhu kumbe minhlangano leyi nga na switirhisiwa swa timali,” a hlamusela. “Hi lava lava nga hundzulaka misava leyi yi va nchumu wa nkoka no vuyerisa miganga ya mina,” u vurile, a engetela leswaku a swi twali ku va na vanhu lava lavaka mintirho swinene loko va tshamile emisaveni leyi nga vaka na vuswikoti byo va humesa rifuwo.
“Loko u languta laha, uta vona leswaku ndhawu leyi yi kulu swinene naswona khale a yi tirhisiwa ku endla vurimi,” a vula. “Kambe a hi nge swikoti ku yi tirhisa sweswi hikuva hi pfumala mati na switirhisiwa swo yi rima,” u ye emahlweni, a vula leswaku leswi hi swona leswi endleke leswaku va lava vanhu lava nga na mali yo nghenelela no pfuneta.
Hi nkarhi walowo, Maswanganyi sweswi u nghenelerile eka mpfilumpfilu wa misava na hosi Nhlaniki, loyi a nga tshama a tirha tanihi hosana ehansi ka yena. Mpfilumpfilu lowu wu landzela ku amukeriwa ka yena tanihi hosi hi 2020, hi ku ya hi xitsundzuxo ku suka eka Khomixini ya Minkanerisano na Swikoxo swa Vurhangeri bya Ndhavuko (CTLDC).
Maswanganyi u nghenise xikombelo eka CTLDC hi lembe ra 2012, a lava ku vuyiseriwa tanihi murhangeri lonkulu wa ndhavuko wa muganga wa ka vona. Eka xihehlo xa yena, u hehle leswaku vuhosi bya muganga wa ka vona byi lahlekile hi 1957 byi ya eka hosi Nhlaniki loko mfumo hi nkarhi walowo wu hlanganisa miganga yo hlaya ehansi ka murhangeri un’we lonkulu wa ndzhavuko.
Ku vekiwa ka yena tanihi murhangeri lonkulu wa ndzhavuko ku endlekile hi Hukuri 2021. Hambiswiritano, leswi a swi tekanga nkarhi wo leha, tanihi leswi endzhaku khoto ya le henhla ya Polokwane yi nga hundzula xiboho xo n’wi amukela tanihi hosana endzhaku ka ku kaneta hi hosi Nhlaniki. Ku sukela kwalaho, mhaka leyi yi nghene hi nhloko eka milandzu leyi yaka emahlweni ya le khoto.
Xiyimo lexi a xi se tlhantlhiwa, kambe Maswanganyi u ya emahlweni a kuma muholo wa yena tanihi murhangeri lonkulu wa ndhavuko [hosi]. Ku endla xiendlakalo xo tlangela siku ra Maswanganyi hi Ravuntlhanu a ku ri ku kaneta hosi Nhlaniki, loyi a ha sindzisaka leswaku Maswanganyi i hosana.
Hi nkarhi lowu fanaka, Cassin Mabunda, mutshamaxitulu wa Nhlangano wa Vurhangeri bya Ndhavuko, lowu seketelaka varhangeri va ndhavuko lava nga susiwa eswitulwini swa vona eGiyani, u komberile vaaki va Maswanganyi ku seketela hosi ya vona.
U vule leswaku: “Hinkwenu mi fanele ku hlengeletana endzhaku ka hosi ya n’wina mi yima na yona ku fikela emakumu loko mi lava ku vona vululami byi hlula.” Mabunda u engeterile leswaku nhlangano wu ta yisa emahlweni matshalatshala ya wona ku tiyisisa leswaku varhangeri hinkwavo va ndhavuko lava nga bakanyeriwa etlhelo eGiyani va amukeriwa hi mfumo.
“Tanihi nhlangano, hi tiyimiserile ku lwisana na ku pfumaleka ka vululami loku endliwaka hi varhangeri van’wana va ndhavuko lava nga na makwanga, naswona hi tshemba swinene leswaku, eku heteleleni, hi ta humelela ku kuma ku xiximiwa eka murhangeri un’wana na un’wana wa ndhavuko eGiyani,” ku vula yena.
Loko a vulavula eka xiendlakalo lexi, mukhanselara Gezani Maluleke, loyi a yimelake meyara wa Giyani, u kandziyisile ku tinyiketela ka masipala ku tirhisana na varhangeri hinkwavo va ndhavuko eGiyani. U tivise leswaku masipala wu ta sungula ku nyika swipfuno eka varhangeri hinkwavo va ndhavuko lava nghenelaka eka swiendlakalo na minhlengeletano ya wona.
“Tanihi masipala, hi tekile xiboho eka ntshamo wa hina wa huvo ya sweswinyana ku hakela swipfuno eka varhangeri hinkwavo va ndhavuko eGiyani na ku va katsa eka khalendara ya masipala wa hina. Sweswi ndzi vulavulaka, xifaniso xa hosi Maswanganyi sweswi xi ta humelela etlhelo ka varhangeri van’wana va ndhavuko eka masipala wa Giyani,” ku vula yena. Khale, i varhangeri va ndhavuko ntsena lava amukeriweke ehansi ka sisiteme ya khale lava a va kombisiwa eka khalendara ya masipala.
