Wansati loyi a hluphekeke a kombela mpfuno

Hi Orlando Chauke

Wansati wa malembe ya 53 hi vukhale wo huma emugangeni Ngume endhawini ya Mashavele u endle xikombelo xa mpfuneto wo fulela yindlu ya yena leyi swi nga ni malembe yo hlaya a ri karhi a ringeta ku yi hetisa.

Tintswalo Grace Mathonsi, manana wa vana va ntlhanu tlhelo Kokwana wa xisati eka vana vanharhu, sweswi u tshama na ndyangu wa yena eka yindlu ya kamara rin’we leyi onhakeke naswona yi nga khomanisiwa na yindlu leyi nga helelangiki. Ndyangu lowu wu langutane ni mintlhontlho leyikulu, ngopfu-ngopfu hi nkarhi wa maxelo yo biha.

Tanihi manana loyi a nga yexe, vutomi bya yena byi tele hi mintlhontlho ku sukela loko nuna wa yena a khomiwe hi vuvabyi bya miehleketo emalembeni yo karhi lama hundzeke, leswi n’wi siyeke a rhwala vutihlamuleri lebyi heleleke bya ku kurisa vana va vona a ri yexe.

Handle ka ku zama zama kakwe, ndzhwalo wo ondla ndyangu wa yena loko a ri karhi a ringeta ku hetisisa ku akiwa ka kaya ra vona wu tikombise wu ri lowukulu, tanihi leswi a nga tirhiki naswona a titshegeke hi mali ya mpfuneto ku suka eka mfumo [mudende].

Yindlu leyi yi nga hetiwangiki yi yime tanihi vumbhoni bya ku tiyisela ka yena na ku tiyimisela ka yena, kambe handle ka switirhisiwa leswi lavekaka, u tsandzekile ku humelerisa xivono xo va ni kaya leri tiyeke no sirheleleka leswaku ndyangu wa yena wu tshamiseka.

“Ndzi ringetile ku ringana malembe yo tala ku heta yindlu leyi leswaku ndyangu wa mina wu ta hanya hi ku ntshuxeka, kambe a ndzi humelelanga,” ku hlamusele Mathonsi, a vula leswaku eka malembe lama hundzeke ku sukela hi 2006, a ringeta ku endla xikombelo xa yindlu ya RDP kambe a nga kalanga a tekeriwa enhlokweni.

“Hi tele eka ndhawu leyi leyitsongo, naswona a yi hlayisekanga, ngopfu-ngopfu eka vana,” a hlamusela, a engetela leswaku ku vilela ka yena lokukulu a ku ri xilaveko xa xihatla xa mali yo seketela vana va yena vambirhi va Giredi ya 12. “Ndzi na vana vambirhi eka Giredi ya 12, naswona ndzi lava magidi manharhu ya Tirandi leswaku un’wana na un’wana wa vona a ya eka tidyondzo to engetela na le khempeni ku nga si sungula swikambelo swa vona swo hetelela,” ku vula yena.

Mathonsi u kombela eka lava nga na swa le mandleni vahi na vahi lava nga ta tsakelaka ku pfuneta eka ku nyika switirhisiwa na nseketelo lowu lavekaka ku hetisa yindlu yakwe leswaku eku heteleleni a ta kota ku va na yindlu leyi faneleke yo tshama eka yona na ndyangu wa yena. “Leswi ndzi swi lavaka i ku fulela yindlu ya mina; mali yihi na yihi ya munyikelo ya amukeleka,” ku vula yena.

Lava tiyimiseleke ku pfuneta va nga endla ku hambana lokukulu evuton’wini bya ndyangu lowu, va va pfuna ku cinca ku suka eka xiyimo xo hanya lexi nga sirhelelekangiki va ya ekaya leri hlayisekeke ni leri sirhelelekeke. Un’wana na un’wana loyi a lavaka ku pfuneta a nga tihlanganisa na Mathonsi eka 0736223903 kumbe makwavo wa yena eka 0826733720.