GGM yi khoma timbuti

Share the News

Hi Orlando Chauke

Masipala wa Greater Giyani (GGM) wu tekile magoza yo tika ku lawula swifuwo leswi famba fambaka endzeni ka doroba ra Giyani (CBD) hi ku khoma timbuti leti lahlekeke hi ku landza milawu na swiletelo swa masipala.

Timbuti ta nkombo ti kumiwile ti ri karhi ti famba-famba edorobeni ra Giyani CBD, leswi kavanyetaka ku famba ka mimovha naswona swi tisa khombo eka vachayeri va mimovha lava va nga ha tlumbanaka na tona hi ku olova. Vini va timbuti leti khomiweke va komberiwa ku endzela masipala ku tiyisisa vun’wini na ku koxa swifuwo swa vona.

Ku humelela eka ku koxa timbuti ta vona, vini va tona vafanele ku nyika matsalwa yokarhi ku tiyisisa vun’wini. Leswi swikatsa khadi ra xitoko, leri tirhaka tanihi vumbhoni bya vun’wini bya swifuwo. Ku engetela kwalano, va fanele ku humesa xitifikheti lexi vitaniwaka brand marking, loko xi ri kona, ku tiyisisa loko timbuti ti ri ta vona.

Ku ya emahlweni, vini va fanele ku nyika tsalwa leri humesiweke hi maphorisa (SAPS), leri hi ntolovelo ri vuriwaka afidavhiti. Afidavhiti leyi yi tirha tanihi xitatimende xa ximfumo lexi tiyisisaka vun’wini lebyi faneleke bya timbuti.

Masipala wu tshikelela nkoka wo tisa matsalwa hinkwawo lama lavekaka ku hatlisisa endlelo ro tiyisisa na swikoxo, ku tiyisisa leswaku swifuwo swi tlheriseriwa eka vini va swona lava faneleke handle ko hlwela. “Handle ka matsalwa lama vuriweke, a swi ta tika ku kombisa vun’wini; hikokwalaho, ha ma lava,” ku vula muvulavuleri wa masipala Steve Mavunda.

Hi ku ya hi yena, timbuti leti khomiweke ti ta hlayisiwa endhawini ya masipala yo hlayisela swifuwo leswi khomiweke ku ringana masiku yo tlula 21 ku nyika vini va tona nkarhi wo ta emahlweni, va hakela mali leyi lavekaka ya ku khomiwa, na ku koxa swifuwo swa vona. U tlhele a hlamusela leswaku eka nkarhi lowu, masipala wu tiyisisa leswaku swifuwo swi hlayisiwa kahle.

“Loko timbuti ti tshama ti nga koxiwi endzhaku ka nkarhi lowu wa masiku ya 21, masipala wu na mfanelo yo ti xavisa hi endlelo ra ‘auction’,” ku vula yena. Mali leyi kumiwaka eka ‘auction’ hi ntolovelo yita tirhisiwa ku hakela switirhisiwa leswinga endliwa hinkarhi wa maendlelo yo khoma swifuwo, kufana naku phamela naku hlayisa swifuwo, xikan’we na tihakelo tihi na tihi ta vufambisi.

Masipala wu kombela vini va swifuwo hinkwavo ku teka goza hi xihatla. “Hi kombela un’wana na un’wana loyi a lahlekeriweke hi timbuti ta yena ku endzela masipala no tiyisisa loko swifuwo swa yena swi ri exikarhi ka leswi khomiweke,” ku hlamusela Mavunda.

U boxe leswaku goza leri ri kongomisiwile ku tiyisisa ku landzeleriwa ka milawu ya masipala loko ku ri karhi ku lulamisiwa mintlhontlho leyi vangiwaka hi swifuwo leswi famba-fambaka eka tindhawu ta mani na mani. “Vaaki va tsundzuxiwa ku hlayisa hi vukheta lebyi faneleke na ku nyika vulawuri lebyi ringaneleke eka swifuwo swa vona ku sivela timhangu to fana na leti enkarhini lowu taka,” ku engetela Mavunda.

Leswi a hi ro sungula masipala wu khoma swifuwo. Hi lembe ra 2023, Masipala wa Greater Giyani (GGM) wu xavise tihomu to hlaya leti a ti khomiwile endzeni ka doroba. Vuyelo lebyi fanaka byi rindzele timbuti loko tinga koxiwi hi nkarhi lowu vekiweke.

 

 

 

 

 

 

 

 

 

 

 

 

 

 

 

 

 

 

 

 

Mathunse Hlukani

Hlukani Mathunse is a talented journalist and media professional with a passion for storytelling and community engagement.

Mathunse Hlukani has 369 posts and counting. See all posts by Mathunse Hlukani

Leave a Reply

Your email address will not be published. Required fields are marked *