Emmanuel FC yi yima eka xiyimo xa vumbirhi
Hi Ntsakisi Gracia Chauke
Xipano xa Emmanuel FC lexi tlangaka eka ligi ya ABC Motsepe Stream A xa ha tshamile eka xiyimo xa vumbirhi, leswi swi landzela endzhaku ka loko xipano lexi xi tlangile na xipano xa Vondwe XI Bullets erivaleni ra mintlangu ra Malamulele hi mugqibela wa siku ra vu 27 Dzivamisoko 2024.
Swipano leswi haswimbirhi a swi ombanile ku pfumaleka na xin’we xo howisa. Swa ha te tano, xipano xa United Artists xi tlangile na xipano xa Maruleng Celtic FC erivaleni ra mintlangu ra makhuvha hi siku leri fanaka laha xi nga hlula hi 1:0 leswi nga endla leswaku xipano xa Vondwe XI Bullets xi suka eka xiyimo xa vunharhu kuya eka xiyimo xa vumune. Kasi United Artists yi sukile eka xiyimo xa vuntlhanu kuya eka xiyimo xa vunharhu.
Mpheni Defenders yi tama ya ha ri eka xiyimo xo sungula hi 31 wa mikutlunya, leswi swi landzela endzhaku ka loko na xona xipano lexi xi tlangile na Winners Park hi mugqibela laha ntlangu wu nga tshikiwa exikarhi.
Kuya hi va Soccer Venom, “ntlangu lowu a wu fikanga emakumu tanihi leswi xipano xa Winners Park xi nga ala penati ya vumbirhi leyi nyikiweke Mpheni Defenders. Swa ha te tano, penati yo sungula yi nyikiwe hi xiphemu xo sungula xa ntlangu naswona yi tlheriseriwe endzhaku tanihi leswi n’watipala wa Winners Park a a ala ku ya eka ntila wa le tipaleni. Penati ya vumbirhi yi tlhele yi ariwa hi mutlangi wa Winners Park leswi nga endla leswaku ntlangu wu nga ha fiki emakumu.”
Ku vuriwa leswaku a hi ro sungula xipano xa Winners Park xi endla swilu swa muxaka lowu, xi endlile tano loko xi hlangana na Munaca FC laha xi nga ala penati leyi nyikiweke Munaca FC.
kasi leswi swi siye valandzeri va bolo emunyameni leswi nga tivekiki leswaku ku ta endleka yini. Swi nga ha endleka swipano leswi mbirhi swi tlanga nakambe kumbe xipano xa Mpheni Defenders xi nyikiwa mikutlunya yi nharhu kambe leswi hinkwaswo swi ta ti komba kahle loko xipano xa Winners Park xo khomeriwa nhlangano wa xihatla wa ‘disciplinary hearing’.
Ligi a yi languteriwile ku fika emakumu hi siku ra vu 4 mudyaxihi 2024 kambe ka ha ri na swipano leswi nga salela endzhaku loko ku langusiwa mintlangu leyi swi yi tlangeke. Hambiswiritano, xipano xa Emmanuel FC xi ya tlanga na Winners Park loko xipano xa Vondwe XI Bullets xi ta ya langutana kahle na Maruleng Celtic FC, kasi Mpheni Defenders yi ya tlanga na Madritas FC hi mugqibela wa siku ra vu 4 Mudyaxihi 2024.
Mpheni Defenders yi nga ha hlula eka ligi leyi tanihi leswi yinga yima kahle eka xiyimo xo sungula. Naswona xipano lexi xi salele endzhaku hi ntlangu wun’we loko xi pimanisiwa na xipano xa Emmanuel FC.
