Spar xi nyikela switirhisiwa swa xikolo
Hi Themba Chauke
Hi matshalatshala yo seketela dyondzo, switolo swa Spar eGiyani na Saselamani swi tirhisanile ku nyikela switirhisiwa swo swa dyondzo eka xikolo xa le hansi xa Jim Nghalalume eMugangeni wa Jim, eGiyani. Vadyondzisi ni vadyondzi a va tsakile naswona va nkhense mphakelo lowu wa nkoka.
Kuya hi mufambisi wa xitolo xa Spar lexi kumekaka eGiyani Shadrack Tshilowa, kungu leri i xiphemu xa nongonoko wo anama lowu sweswi wu fambisiwaka hi ntlawa wa switolo swa Spar leswi tirhaka ehansi ka Ntlawa wa Injhabulo. “Nongonoko lowu wu endleriwe ku pfuna vana lava pfumalaka switirhisiwa swa nkoka swa xikolo swo tanihi swilo swo tsalela eka swona ni yunifomo leyi faneleke, ku tiyisisa leswaku va kota ku nghena xikolo handle ko kavanyetiwa.
“Ni vone ndlela leyi vadyondzisi va amukeleke swilo swo tsalela ha yona—va ntshunxekile hi ku tiva leswaku va ta swi kota ku pfuna van’wana va vana lava nga riki na swilo leswi ringaneke leswaku va ya exikolweni.” Ku engetela kwalaho, mutirhikulobye wa yena, Mmapula Malebatja, mufambisi wa xitolo xa Spar eSaselamani, u vule leswaku Spar yi tiyimiserile ku pfuna vaaki hi tindlela to tala, ku nga ri ntsena hi ku tirhisa nongonoko wo tlhelela exikolweni.
Spar yi na minongonoko yin’wana yo tala leyi endleriweke ku pfuna switolo ku tshama swi ri na vuxaka na vaxavi va swona. “Leswi i ku hlayisa vunghana bya hina na vaaki hi ku va seketela hi laha hi nga kotaka tanihi ndlela yo tlherisela ku nyikela eka vanhu lava hi seketelaka,” ku vula yena. “Kungu ra ku hangalasiwa ka minyikelo ri kombisa ku tinyiketela ka Spar ku endla nkucetelo lowunene eka vaaki. Hi ku tiyisisa leswaku vadyondzi lavatsongo va na switirhisiwa leswi lavekaka eka dyondzo ya vona, khamphani a yi tlheriseli ku nyikela ntsena kambe yi tlhela yi vekisa eka vumundzuku bya vana lava yi va tirhelaka,” ku vula yena.
Loko a vulavula hi minyikelo leyi, Shadrack Boloyi, un’wana wa vadyondzisi exikolweni, u amukerile minyikelo leyi, a vula leswaku yi ta pfuna swinene eka vadyondzi va vona. “Hi na madzana ntlhanu na makume nkaye ntlhanu wa vadyondzi laha, vo tala va vona va huma eka mindyangu leyi pfumalaka leyi nga kotiki hambi ku ri ku xava tikhavhara ta tibuku ta vona,” a byele ntlawa wa Spar.
“Tolo kunene, vadyondzi van’wana va tile etlilasini ya mina va khome tibuku leti nga khavhariwangiki. Ndzi kanakana, ndzi ehleketa ku va rhumela ekaya leswaku va ya khavhara tibuku ta vona, kambe endzhaku ka sweswo ndzi xiye leswaku vatswari va vona kumbexana a va nga ri na mali yo xava tikhavhara. Kutani, ndzi va tshike va tshama etlilasini ya mina. Tikhavhara leti mi ti tiseke namuntlha, kun’we ni switirhisiwa swin’wana, swi ta va pfuna hakunene. Va ta ya ekaya na tikhavhara namuntlha, naswona hi tshemba leswaku, mundzuku, tibuku ta vona ti ta va ti khavhariwe kahle loko va vuya,” ku vula yena.
Hi nkarhi lowu fanaka, mutshamaxitulu wa SGB wa xikolo lexi, Mike Chauke, na yena u amukerile minyikelo leyi, a vula leswaku yi ta pfuna ku hlohlotela vana ku nghena xikolo. “Ku hoxa xandla loku ku ta khutaza vana va hina ku lava ku ya exikolweni hikuva, handle ka switirhisiwa swa xikolo leswi lavekaka, vana va nga ha titwa va hela matimba, va tiva leswaku vadyondzisi va nga va tshinya hi ku va va nga khavharangi tibuku,” ku vula yena.
