Ku kumiwa ntsumbu wa phorisa eLimpopo
Maphorisa ya Afrika Dzonga eLimpopo ya vilerisiwa hi ku lahlekeriwa hi Sejeni Juliet Motshwene, loyi ntsumbu wa yena, wu nga kumiwa ehandle ka muganga wa ka vona wa Kgapamadi hi Sonto.
Ku vikiwa leswaku, wansati loyi wa malembe ya 45 hi vukhale u vikiwile kuva a lahlekile loko ntsumbu wa wena wu nga se kumeka.
Sejeni Motshwene a tirhela tanihi phorisa exitichini xa maphorisa xa Rakgwadi exifundzhenintsongo xa Sekhukhune.
Khomixinara wa maphorisa wa xifundzakulu xa Limpopo wo khomela, Major General Jan Scheepers, u yisile marito yo chavelela eka ndyangu na varhandziwa va Sejeni Motshwene.
Kasi Muvulavuleri wa maphorisa ya xifundzhakulu Colonel Malesela Ledwaba u komberile swirho swa vaaki ku luma Maphorisa ndleve loko vatwa hungu rihi na rihi leri fambelanaka na mhangu leyi.
“Maphorisa ya lava mpfuneto hi xihatla ku paluxa swiyimo leswi rhendzeleke rifu ra Sejeni Motshwene na ku khoma vaendli va mhangu leyi,” ku vula Muvulavuleri wa Maphorisa Colonel Malesela Ledwaba.
Vulavisisi bya Maphorisa byi karhi no ya emahlweni, naswona vatshemba ku khoma vaendli va mhangu leyi ku nga ri khale.
