38 Wa Swichudeni swi Vavisekeka Eka Mhangu Ya Bazi
Eka mhangu yo karhata leyinga humelela tolo ni nhlekani, 38 wa vadyondzi vo huma exikolweni xa le hansi xa Modderspruit eBele-Bela, exifundzhenintsongo xa Waterberg, va hlanganile na mhangu ya bazi loko va ri karhi va vuya exikolweni.
MEC wa Dyondzo wa Limpopo, Mavhungu Lerule-Ramakhanya, u kombisile ku vilela lokukulu loko a twa hi xiendlakalo lexi xo biha.
Hi ku ya hi swiviko leswi humaka eka Maphorisa, mhangu leyi yi humelerile loko tibiriki ta bazi ti nga tirhi, leswi nga endla leswaku ri tlumbana na rirhangu ra switina eBela-Bela Aventura.
“Loko hi khensa ku va ku nga ri na mafu, 38 wa swichudeni swi vavisekile hi ku hambana hi ku tika,” ku vula MEC Lerule- Ramakhanya.
Eka lava vavisekeke, mudyondzi un’we u hundziseriwe exibedlhele xa Mokopane, un’wana a yisiwa exibedlhele xa le Pitori, kasi vadyondzi lava saleke va tshunguriwile endhawini ya mhangu loko va nga se ntshunxiwa vaya emakaya.
MEC Lerule-Ramakhanya u hundzisele ku vilela ka yena, a kandziyisa xilaveko xa swo famba leswi hlayisekeke eka vadyondzi na ku sola ku tirhisiwa ka mimovha leyi nga fambekiki egondzweni.
“Hi lahlekeriwe hi marito ku va hi dyondze leswaku nhlayo leyi ya le henhla ya vadyondzi yi katsekile eka mhangu leyi. swi le rivaleni leswaku vaphakeri va vukorhokeri bya vutleketli va tirhisa mimovha leyi nga fanelangiki kuva egondzweni loko va ri karhi va rhwala vadyondzi va hina,” ku vula MEC Lerule-Ramakhanya.
Ndzawulo ya Dyondzo yi vuyelerile pholisi ya yona yo pfumala ku tiyisela eka lava vekaka vuhlayiseki bya vutomi bya vantshwa ekhombyeni hi ku honisa milawu ya magondzo.
” Ku engetela kwalaho, nseketelo wa swa miehleketo na swa ntshamiseko wu ta andlariwa eka vaaki va xikolo lava khumbekaka ku pfuneta ku langutana na vuyelo bya mhangu leyi,” ku engetela MEC.