Ku tsandzeka Ku Rhumela Ambulance Swi koxa Vutomi bya Xigulani

Vaaki va muganga wa Ga-Chuene va rila ku lahlekeriwa hi xirho xa vaaki xa nkoka lexi ku henhliwaka leswaku xi hundzile emisaveni hikwalaho ka ku honisa eka tliliniki ya le kusuhi.

Mahelo ya vhiki lama nga hundza, vutomi bya muvabyi wa xinuna byi tsemiwile hi ndlela yo vava endzhaku ka loko ku vuriwa leswaku vatirhi va tliliniki va tsandzekile ku rhumela ambulense leswaku a ta hundziseriwa exibedlhele xa Lebowakgomo kuya kuma vutshunguri hi xihatla.

Hi ku ya hi vaaki, ndlela leyi tliliniki yi khomaka swiyimo swa xihatla ha yona a yi basangi, laha swivilelo swi sukelaka eka swiphiqo swa mavonelo exikarhi ka vatirhi ku ya eka ku nga hlamuli hi xihatla eka mavabyi lawa ya koxaka vutshunguri bya xihatla.

Andries Tema, muaki, burile na Capricorn news talk a kombisa ku vilela, a vula leswaku ku suka eka muamukeri ku ya eka vatirhi va vuongori, ku vonaka ku ri na ku pfumala ku tsakela eka swiyimo swa xihatla.

Neil Shikwambana, muvulavuleri wa Ndzawulo ya Rihanyu eLimpopo, u amukerile ku tika ka swihehlo leswi naswona u tiyisisile vaaki leswaku vulavisisi byi ta endliwa hi hofisi ya mufambisinkulu wa muganga.

Shikwambana u kandziyisile xiave xa titliliniki na switirhisiwa swa rihanyo eku pfuneni ka miganga naswona u hlambanyile ku lulamisa swihoxo swihi na swihi leswi paluxiweke hi nkarhi wa vulavisisi.

Tema u hlamusele ntokoto lowu khomisaka gome wa muvabyi wa xinuna, loyi hambileswi a nga vilela hi switlhavi swo tika ekhwirini, a nga nyikiwa ntsena papila ro rhumela na ku lerisiwe ku ya lava vutshunguri exibedlhele xa Lebowakgomo.

Lexi hlamarisaka, ku hehliwa leswaku tliliniki leyi yi arile ku nyika muvabyi murhi wihi na wihi wo tshungula switlhavi naswona yi arile ku hlela leswaku muvabyi a hundziseriwa exibendlhele hi ambulense.

Loko a hlamula swivutiso mayelana na vukorhokeri bya ti-ambulensi, Shikwambana u hlamuserile leswaku a ku na pholisi kumbe nawu lowu vulaka leswaku ti-ambulensi ti vekeriwe vavasati lava tikeke ntsena.

U kandziyisile nkoka wo hlamula hi xihatla eka tinxaka hinkwato ta swiyimo swa xihatla swa mavabyi, a kandziyisa xilaveko xa mfikelelo wo ringana eka mpfuneto wa swa vutshunguri ku nga langutiwi muxaka wa xiyimo xa xihatla.