Maphorisa ya khoma ntsevu wa vaehleketeleriwa

Hi Themba Chauke

Vavanuna va tsevu, va malembe ya le xikarhi ka 21 na 47, va khomiwile hi ku hambana hi Musumbhunuku wa ti 17 Nyenyenyani, mayelana na nandzu wo chavisa wa ku pfinya, ku tlhakisa, na ku phanga lowu nga humelela emugangeni wa Hlaniki hi ti 29 ta Sunguti. Muhlaseriwa loyi a nga xirho xa vaaki lexi tivekaka swinene, u hlaseriwile ekaya ra yena, a phangeriwa, a tlhakisiwa, ivi endzhaku a xanisiwa hi swa masangu a nga si tshikiwa eswihlahleni.

Hi ku ya hi swiviko swa maphorisa, muhlaseriwa a ri kusuhi no pfala gede ya yena loko vavanuna vambirhi lava hlomeke va tshinelela, va n’wi kombetela hi xibalesa, va n’wi sindzisa ku tlhelela endzeni ka yindlu ya yena. Kwalaho, va n’wi tekele riqingho-nyonga, laptop ni mali yakwe va nga si chayela na yena hi movha wakwe. Ku vikiwa leswaku vaehleketeleriwa lava va yime ekhwatini ekusuhi na muganga wa Gon’on’o, laha ku hehliwaka leswaku un’wana wa vona u n’wi pfinyile.

Loko ku hlaseriwa loku ku ri karhi ku endleka, ku hehliwa leswaku vaehleketeleriwa van’wana va tsutsumele endhawini ya mavhengele ya le kusuhi ku ya humesa mali hi ku tirhisa makhadi ya le bangi ya muhlaseriwa. Endzhaku ka maxangu lawa, vaehleketeleriwa va balekile hi milenge, va siya muhlaseriwa na movha wa yena.

Mhangu leyi yi pfuxe ku hlundzuka na ku vilela endzeni ka vaaki, leswi endleke leswaku ku va na vulavisisi lebyikulu lebyi a byi rhangela hi va Mopani District Tracking Team, Mopani District Trio Crime Investigators, na Mopani Highway Patrol. Matshalatshala ya vona ya fikelele makumu hi ku khomiwa ka vaehleketeleriwa va tsevu eka tindhawu to hambana hambana leti rhendzeleke Giyani na Hlanganani.

Muehleketeleriwa wo sungula, wa malembe ya makume mune nkombo hi vukhale, loyi a nga muaka-tiko wa matiko mambe, u kumiwile a ri na riqingho-nyonga leri yiviweke. Wanuna wa makume nharhu wa malembe hi vukhale na yena u khomiwile emugangeni wa Tshikonele endhawini ya maphorisa ya Saselamani eka Xifundzhantsongo xa Vhembe hikwalaho ko va na laptop leyi yiviweke. Ku hehliwa leswaku vaehleketeleriwa lava havambirhi va xavile swilo leswi yiviweke eka muehleketeleriwa lonkulu, wanuna wa makume nharhu wa malembe hi vukhale loyi a laviwaka hi nandzu wo pfinya, ku phanga na ku tlhakisa.

Muehleketeleriwa lonkulu u khomiwile emugangeni wa N’wamatatani, xikan’we na vatirhisani vambirhi va malembe ya 21 na 30. Lava vanharhu va kumiwile va tumbele endlwini ya RDP, laha va nga tlhela va kumeka va ri na xibalesa lexi nga riki na maphepha na swilo leswi ehleketeleriwaka kuva swilo yiviwa. Vulavisisi byin’wana byi endle leswaku ku khomiwa wanuna wa makume mune wa malembe hi vukhale emugangeni wa Ndhengeza, loyi a nga makwavo wa muehleketeleriwa lonkulu. U tlhele a kumeka a ri na xibalesa lexi nga riki na maphepha na nhundzu leyi yiviweke. Vaehleketeleriwa va langutane na swihehlo swo tala, ku katsa na ku va na xibalesa lexi nga riki na maphepha na matlulu, ku phanga, ku tlhakisa, ku pfinya, ku va na nhundzu leyi ehleketeleriwaka kuva yi lo yiviwa, na ku tlula nawu wa vuhlapfa.

Khomixinara wa maphorisa wa xifundzhankulu xa Limpopo, Lieutenant General Thembi Hadebe, u bumabumerile maphorisa eka goza ra xihatla na ku tinyiketela ku khoma vaehleketeleriwa. “Ntirho lowu wu humeleleke i vumbhoni bya ntirho wo tika na ntirhisano wa swirho hinkwaswo leswi katsekaka. Hi ta ya emahlweni hi tirha hi nga karhali ku tiyisisa vululami eka vahlaseriwa na vaaki,” ku vula yena. Hi nkarhi lowu fanaka, vaehleketeleriwa va languteriwa ku ya emahlweni ka khoto ya majistarata ya Giyani ku nga ri khale, loko vulavisisi byi ya emahlweni ku kuma vaehleketeleriwa lava saleke lava fambelanaka na nandzu lowu.