Vaehleketeleriwa va hetelela va voniwe nandzu

Hi Orlando Chauke

Khoto yale henhla ya Thohoyandou yi gwevile vanhu va ntlhanu ekhotsweni hikokwalaho ka ku nghenelela ka vona eka nhlaselo wa madzolonga wa vululami bya ntshungu. Va voniwe nandzu wa vugevenga byo hlayanyana, ku katsa ni ku hlasela hi xikongomelo xo vavisa swinene, ku tlhakisa ni ku dlaya. Mhaka leyi yi fambelana na xiendlakalo xo vava lexi endlekeke hi N’wendzamhala 2022, loko ntlawa lowu wu tlhakisa no hlasela Doctor Mabunda wa malembe ya 22 hi vukhale, wu n’wi hehla hi ku yiva. Madzolonga lawa ya endle leswaku a hundza emisaveni.

Khoto yi twile leswaku hi ti 7 ta N’wendzamhala 2022, Doctor Mabunda wa malembe ya 22 hi vukhale u hehliwile hi ku yiva hi swirho swa vaaki emugangeni wa Nkomo 22A. Hi ku chavela vuhlayiseki bya yena, ku vikiwa leswaku u balekile a ya tumbela emugangeni wa Nkambako, ekusuhi na N’wamitwa.

Hambiswiritano, ntlawa wa swirho swa vaaki wu hlele swo famba leswaku wu n’wi kuma. Loko va fika eNkambako, ku hehliwa leswaku va vulavule na sesi wa Mabunda, loyi a nga paluxa laha a tumbele kona. Kutani ntlawa lowu wu n’wi hlongorisile, wu n’wi khoma, wu n’wi sindzisa ku nghena emovheni wa vona wu nga si n’wi tlherisela emugangeni wa Nkomo 22A.

Loko va vuya, ku hehliwa leswaku vaehleketeleriwa va bile Mabunda eka ndhawu ya vuhangaselo ya le kusuhi va nga si n’wi yisa endhawini leyi a ku hlengeletaniwa eka yona emugangeni, laha ntshungu lowukulu a wu hlengeletanile kona. Nhlaselo lowu wu ve ni madzolonga swinene loko vanhu vo tala va nghenela. Ku hehliwa leswaku u hisiwile hi petirolo na mathayere, leswi nga endla leswaku a hundza emisaveni.

Ku pfuriwile nandzu wu nyikiwa Detective Sergeant Dayson Mabunda kusuka eka maphorisa ya Giyani. Endzhaku ka masiku manharhu, Detective Mabunda u khomile vaehleketeleriwa va ntlhanu lava fambelanaka na ku dlaya na ku xanisa. Kambe hi ti 11 ta N’wendzamhala 2022, vaehleketeleriwa va nyikiwile beyili ya R1,000 ha wun’we.

Vaehleketeleriwa a va humile hi beyili hi nkarhi wa ku tengiwa ka nandzu; hambiswiritano, ntshunxeko wa vona wu herisiwile hi ti 14 Nyenyenyani loko Khoto ya Thohoyandou yi va vonile nandzu wo hlasela hi xikongomelo xo vavisa (GBH), ku tlhakisa na ku dlaya. Endzhaku ka sweswo va gweviwe hi ti 20 ta Nyenyenyani.

Swigwevo hi leswi landzelaka: Muhehliwa wo sungula, Mfumo Mashimbye (30), muhehliwa wa vumbirhi, Tiyiselani Mabunda (33), na muhehliwa wa vunharhu, Nsovo Lecent Ngobeni (22), ha wun’we va gweviwe ku tshama ekhotsweni malembe ya 20 hi nandzu wo dlaya na 5 wa malembe ya ku tlhakisa. Swigwevo swo dlaya na ku tlhakisa swi ta famba hi nkarhi wun’we. Hi nkarhi lowu fanaka, muehleketeleriwa wa vumune, Tebogo Manganyi (28), na muehleketeleriwa wa vuntlhanu, Nkuriso Mahumani (20), havambirhi va gweviwile ku tshama ekhotsweni malembe ya 3 na xigwevo xo yimisa/ yirisa malembe ya 5 eka ku tlhakisa na ku hlasela.

Khomixinara wa maphorisa ya xifundzhankulu xa Limpopo, Lieutenant General Thembi Hadebe, u amukerile xigwevo lexi, a vula leswaku xi ta tirha tanihi xisirhelelo eka lava va ehleketaka ku endla vugevenga byo fana na lebyi. “Ku khomiwa loku ku rhumela hungu leri nga erivaleni no tiya ra leswaku lava va tekaka nawu va wu veka emavokweni ya vona va ta langutana na matimba hinkwawo ya nawu,” ku vula yena.