Wanuna a tlhaveteriwa

Hi Ntsakisi Gracia Chauke

Ku holova lokukulu endhawini ya vuhungaselo eSaselamani hi Mugqivela ku siye vaaki va ri karhi va chava endzhaku ka loko wanuna wa makume mune n’we wa malembe hi vukhale a tlhaveteriwile a hundza emisaveni. Kwalomu ka awara ya nharhu ni nhlekani, maphorisa ya hlamule riqingho leri a ri vika ku tlhaveteriwa ka munhu endhawini yo xavisa byalwa leyi tivekaka tanihi le ka Russia eSaselamani.

Loko ya fika, maphorisa ya kume muhlaseriwa a etlele exidziveni xa ngati, a ri ni timbanga letikulu to tlhaveteriwa emirini wakwe wa le henhla. Hambi leswi mpfuneto wu nga kumeka hi ku hatlisa ni ku tsutsumerisiwa exibedlele xa Malamulele, ku vuriwa leswaku muhlaseriwa u hundzile emisaveni loko a fika exibedlele.

Muvulavuleri wa maphorisa ya Xifundzhankulu xa limpopo, Colonel Malesela Ledwaba u vule leswaku: “maphorisa enkarhini wa sweswi ya le ku lavisiseni ka swiyimo leswi rhendzeleke mhangu leyi naswona ya khomile muehleketeleriwa wa xinuna endhawini ya mhangu.” Timbhoni leti nga vona mhangu leyi ti vike leswaku ku holova loku, loku sunguleke tanihi ku nga twanani exikarhi ka muhlaseriwa ni muehleketeleriwa, ku hatle ku hundzuka ku va madzolonga.

Muehleketeleriwa loyi a nga se paluxiwaka vuxokoxoko bya yena, ku vikiwa leswaku u tirhise nchumu wo kariha ku tlhava muhlaseriwa. A swi le rivaleni leswaku i yini lexi susumeteke mholovo lowu. Loko vulavisisi bya maphorisa byi ri karhi byi ya emahlweni, vaaki va sale na gome ni ku chava. Hambiswiritana, maphorisa ya tiyisisile leswaku muehleketeleriwa u khomiwile endhawini ya mhangu naswona ku nga ri khale u ta langutana na nandzu mayelana na ku dlaya loku. Maphorisa ya vika leswaku muehleketeleriwa u languteriwa ku ya emahlweni ka khoto ya majistarata ya Saselamani ku nga ri khale, tanihi leswi ya yaka emahlweni ya lavisisa swiyimo leswi rhendzeleke mhangu leyi.