Ku pfuriwa ka TUT ku hundziseriwa emahlweni

Hi Themba Chauke

Vaaki va Giyani va ta boheka ku rindza ku fikela lembe leri taka vana va vona va nga si nghena yunivhesiti ya laha kaya, endzhaku ka ku simekiwa ka rhavi ra Yunivhesiti ya Thekinoloji ya Tshwane (TUT) eka ndhawu leyi. Yunivhesiti leyi eku sunguleni a yi fanele ku pfuriwa hi Nyenyenyani lembe leri, yi simekiwe eka ndhawu ya khale ya Kholichi ya Giyani tanihi khamphasi ya yona.

Ku vile na ku hlwela loku nga languteriwangiki, ngopfu ngopfu hikuva ntirho wo pfuxeta wa ha faneleke ku hetiwa ndhawu leyi yi nga si amukela machudeni. Miako ya khale ya tikholichi yi lava ku lunghisiwa leswaku yi fikelela swipimelo leswi lavekaka swa dyondzo na vuhlayiseki. Eka mbulavulo wa yena wo sungula wa Xifundzhankulu hi Ravumune, holobyenkulu Dr. Phophi Ramathuba u vule leswaku titlilasi ta dyondzo a ti nge sunguli lembe leri hikuva ka ha ri na ku onhaka lokukulu swinene loku faneleke ku lulamisiwa.

“Lembe leri nga hundza, hi tivise ntirhisano wa hina na holobye wa Dyondzo ya le Henhla, Dokodela Nobuhle Phamela Nkambane, kun’we na vurhangeri bya Yunivhesiti ya Thekinoloji ya Tshwane, ku katsa na muyimeri wa Chancellor loyi a xiximiwaka, Phurofesa Tinyiko Maluleke, ku simeka rhavi ra yunivhesiti leyi eGiyani.

“Manana xipikara, tanihi xifundzankulu xa Limpopo, ha tinyungubyisa swinene hi kungu leri, tanihi leswi ntirho wu yaka emahlweni eka ku simekiwa ka rhavi leri ra yunivhesiti. Nhloko ya rhavi leri se yi thoriwile naswona yi ta sungula ntirho ximfumo eka n’hweti leyi taka ya Dzivamisoko,” u hlamuserile, a vula leswaku u vilerisiwa swinene hi ku onhaka loku vangiweke eka wun’wana wa miako ya khale, leyi sweswi yi lavaka ku lunghisiwa migingiriko ya dyondzo yi nga si sungula.

“Hikwalaho ka sweswo, tidyondzo eka rhavi lerintshwa ra yunivhesiti ti languteriwile ku sungula hi 2026, loko ku pfuxetiwa ku herile,” u vurile, a kandziyisa leswaku maendlelo hinkwawo lama lavekaka lama kongomisiweke eka ku tiyisisa ku pfuriwa ka yunivhesiti hi ndlela leyi humelelaka a ya ya emahlweni hi ndlela leyinene.

U tiyisisile vaaki leswaku mfumo, hi ku tirhisana na vakhomaxiave lava faneleke, wu tirha hi ku hiseka ku hetisisa ntirho hinkwawo lowu nga sala, ku katsa na ku ndlandlamuxiwa ka switirhisiwa na malunghiselelo ya swa tidyondzo, ku tiyisisa leswaku xivandla lexi xi ta hlomisiwa hi ku hetiseka ku amukela ntlawa wa xona wo sungula wa machudeni lembe leri taka.

Hi nkarhi wolowo, hambileswi ku nga na ku tlhelela endzhaku, ku sunguriwa ka TUT eGiyani ku tshama ku ri nchumu wa nkoka, tanihi leswi swi nga ta tisa swivandlanene swa dyondzo ya le henhla ekusuhi na vaaki va ndhawu, ku hunguta xilaveko xa leswaku machudeni ya famba mpfhuka wo leha ku ya eka dyondzo ya le henhla.

Loko se yi tirha, yunivhesiti yi languteriwile ku nyika tikhoso eka tindhawu to hambana, ku katsa na thekinoloji na vurimi, ku tiyisisa swilaveko swa nhluvukiso swa xifundzankulu na ku nyika vantshwa vuswikoti bya nkoka eka nkarhi lowu taka.