Noni ya Ndhuna Clyde Mnisi U Duvuriwile a Lova eMpumalanga
Charlene Felicity Mathews (30), nsati wa mufi Chief Clyde Mnisi, ku hehliwa leswaku u duvuriwile hi Ravumbirhi, April 4, 2023, kwalomu ka awara ya 1:10 a.m. Maphorisa ya le Calcutta sweswi ya le ku lavisiseni ka nandzu wo dlaya, na milandzu yo ringeta ku dlaya.
Maphorisa ya le Calcutta ya vitaniwile eka mhangu leyi nga humelela ekaya ra ndhuna leyi nga lova. Loko va fika laha mhangu yi humeleleke kona, va hlangane ni ntsumbu wa wansati loyi, wu ri ni swilondza swo tala swa swibamu enhlokweni.
Muvulavuleri wa maphorisa ya Mpumalanga Brigadier Selvy Mohlala u vula leswaku, Vavanuna van’wana vambirhi lava tivekaka tani hi swirho swa ndyangu na vona va kume swilondza swa xibamu endzhaku ko duvuriwa, naswona va yisiwe exibedlhele ku ya kuma vutshunguri, kasi hi nkarhi wolowo muhlaseriwa wa xisati u tiyisisiwile leswaku u file hi vatirhi va xilamulela-mhangu.
“Vulavisisi byo sungula hi maphorisa byi paluxe leswaku muehleketeleriwa (vaehleketeleriwa) loyi a hlomeke hi ndlela yo karhi u nghene endlwini a duvula vahlaseriwa lavanharhu ivi a baleka, kambe Maphorisa ya kume tikhathirijhi tin’wana endhawini ya mhangu,” ku vula muvulavuleri wa Mpumalanga Brigadier Selvy Mohlala.
“Ntlawa wa valavisisi wu hlengeletiwile naswona se wu sungurile hi vulavisisi hi ntshembo wo khoma (vaendli) muendli wa vugevenga. Xiphemu xa vulavisisi ku ta va ku kumisisa leswaku muehleketeleriwa (vaehleketeleriwa) u nghene njhani endlwini,” ku engeterile Mohlala.
Eka nkarhi lowu, swivangelo swa ku duvuriwa loku a swi tiveki naswona a ku se khomiwa munhu, ku ya hi Mohlala.
Ndhuna Clyde Mnisi (37) loyi ku nga nuna wa yena, u duvuriwile a lova egondzweni ra Airport ekusuhi na White River ekusuhi na Kruger-Mpumalanga International (KMI) Airport hi vusiku bya Sonto, 26 Dzivamisoko 2023 kwalomu ka awara ya khume-n’we nivusiku. Vadlayi va yena a va si khpmiwa naswona va ha ri eku balekeni.
