Wansati a tlhaveteriwa a hundza emisaveni

Hi Ntsakisi Gracia Chauke

Maphorisa ya Malamulele ya le ku lavisiseni ka nandzu wo hlomula mbilu, wa ku dlayiwa hi tihanyi ka wansati wa malembe ya 30 hi vukhale loyi ntsumbu wakwe wu nga kumeka etlhelo ka gondzo ra R81 ekusuhi na muganga wa Xitlhelani.

Grammy Mthombeni ku suka emugangeni wa Xitlhelani u kumekile a hundzile emisaveni naswona a ri na timbanga ta ku tlhaveteriwa.

Muvulavuleri wa maphorisa ya xifundzhankulu xa Limpopo, Colonel Malesela Ledwaba u kombisile leswaku Loko maphorisa ya fika , va vukorhokerhi bya swa vutshunguri bya xihatla a va ri endhawini ya mhangu laha va nga tiyisisa ku hundza emisaveni ka Mthombeni.

“Nsusumeto wa mhangu leyi a wu se tiveka eka nkarhi wa sweswi. Hambiswiritano, maphorisa ya le ku lavisiseni ku kuma vuxokoxoko hi xitalo naswona nandzu wo dlaya wu pfuriwile,” ku hlamusela Ledwaba.

Loko a ya emahlweni Ledwaba u vule leswaku vaaki va lemukisiwa ku tshama va xalamukile naswona lava va nga ha vaka na vuxokoxoko mayelana na mhangu leyi va komberiwa ku endzela xitichi xa maphorisa xa le kusuhi.