Tatana U Hehliwa Hi Ku Dlaya N’wana Wa Mufana Wa 7 wa Tinhweti Hi Xibamu Xa Pellet
Tatana wa makume nharhu ntsevu wa malembe hi vukhale u khomiwile mayelana na leswi ku vuriwaka leswaku u duvuriwile ku nga ri vomu na ku vangela rifu ra n’wana wa yena wa mufana wa 7 wa tinhweti, hi ku tirhisa xibamu xa pellet eMaololo, emugangeni wa Ga-Mashabela, endzeni ka mindzilakano ya ndhawu ya maphorisa ya Masemola.
Maphorisa exifundzheninkulu xa Limpopo ya vikile leswaku nwana u duvuriwile hi ndlela yo vava exifuveni. Kutani ricece leri ri hatle ri yisiwe etliliniki ya le kusuhi hi vatswari, laha khombo ra kona ku vikiweke leswaku n’wana u lovile loko a fika.
Vulavisisi bya Maphorisa byi paluxe leswaku tata wa n’wana loyi a a hlota swinyenyana hi xibamu xa pellet ekusuhi na kaya ra yena hi nkarhi wa mhangu leyi.
Colonel Malesela Ledwaba, muvulavuleri wa maphorisa ya xifundzhankulu xa Limpopo, u tivise leswaku muehleketeleriwa u ta ya ekhoto ya majistarata ya Nebo hi Ravumbirhi.
