Xigwitsirisi xi endliwa Thangi ra Jojo
Masipala wa Collins Chabane wu hlaseriwile swinene hi ku pfumaleka ka mati, leswi siyeke vaaki vo tala va nga ri na ndlela yin’wana handle ko kuma swintshuxo swa vutumbuluxi ku hlengeleta mati.
Un’wana wa vaaki kusuka etikweni ra Josefa ehandle ka Saselamani, u hundzurile xigwitsirisi xa yena xa khale leswaku xi va thangi ra mati leswaku a ta kota ku hlengeleta mati yo tala hilaha a nga koteka hakona.
Kasi eka karhi wa sweswi muganga lowu wu titshege hi lori leyi tisaka mati eka vaaki, naswona ku hava loyi a tivaka leswaku xiyimo xa mati etikweni xi ta antswa rini, vaaki va boheke ku ta na makungu ya ku kuma mati, tanihi leswi xiyimo xi hundzukeke lexo biha.
Van’wana va vaaki va vula leswaku “A ha ha tivi siku hambi nkarhi wo hetelela lowu hi voneke mati ma khuluka ma huma etipompini ta hina”.
Masipala wa xifundzatsongo xa Vhembe na wa Collins Chabane vafanela ku hlangana kutani va teka goza ro kuma xintshuxo eka ntlhantlho lowu vaaki va langutaneke na wona. I vutihlamuleri bya vona ku tiyisisa leswaku vaaki hinkwavo va fikelela mati yo tenga no ringanela.
Ku titshega hi lori yin’we ku phakela mati emugangeni hinkwawo a swi tshamiseki, naswona masipala wu fanele ku lava tindlela tin’wana ku tiyisisa leswaku vaaki va fikelela mati.
Xiphiqo xa mati eka masipala wa Collins Chabane xi lava ku lulamisiwa hi xihatla, A hi khale ngopfu vaaki va ka Qaza (Maviligwe) va kombisile ku vilela lani a va koxa phakelo wa mati kusuka ka masipala.
