Vaaki va tshembisiwa ku pfuniwa

Hi Ntsakisi Gracia Chauke

Meyara wa masipala wa muganga wa Collins Chabane, Cllr. Shadrack Maluleke, u endzerile mindyangu eka Mtititi, New Orleans, na muganga wa Jilongo hi Sonto endzhaku ka loko xidzedze xi onhe makaya yo tala hi Mugqivela. Meyara u kambisisile ku onhaka a tlhela a tshembisa leswaku masipala wa Collins Chabane, Vhembe, na mfumo wa xifundzankulu swi ta tirhisana ku pfuna lava khumbekeke.

Xidzedze lexi xi siye tindlu ta kwalomu ka ku tlula 40 ti hahlukile, tikhebulu ta gezi na tona ti werile ehansi, leswi siyeke tindhawu tin’wana ti nga ri na gezi. Swa ha te tano, vanhu va ntlhanu va vavisekile laha va nga tsutsumerisiwa exibedlhele ku ya kuma vutshunguri na swona va humile.

Meyara Maluleke, kun’we na Chief Whip Cllr. Erick Baloyi ni vatirhi van’wana ku suka eka xiyenge xa vulawuri bya timhangu eka masipala, va nyike mindyangu leyi hlaseriweke tiphasela ta swakudya, loko ka ha lulamisiwa maqhinga yo lunghisa mindyangu leyi. Tindhawu to tumbela ta nkarhinyana ta karhi ta lulamisiwa, naswona masipala wa ha kambela leswaku ku laveka nseketelo wo tanihi kwihi.

“A hi nge tshiki vaaki va hina va khomiwa hi ndlala loko va rindzele leswaku makaya ya vona ya vuyiseriwa eka xiyimo xa kahle,” ku vula meyara. “Hi ta tirhisana na masipala wa Vhembe na mfumo wa xifundzankulu ku nyika mpfuneto lowu dingekaka. Maqhinga yo lulamisa ku onhaka ni ku pfuna un’wana ni un’wana la khumbekaka ya le ku endliweni.”

Vaaki lava khumbekeke va khensile riendzo ra meyara na nhlamulo ya xihatla. Noria Mabasa, wo huma emugangeni wa Jilongo, u vule leswaku, “ndza khensa swinene. Leswi a ndzi nga swi langutelanga nikatsongo. Hakunene masipala wa Collins Chabane i masipala lowu tirhaka hi xiviri. Mukhanselara wa wadi ya hina u fike endzhaku ka timinete ta 30 ntsena endzhaku ka xidzedze, a hi pfuna ku rhurhela swilo swa hina naswona u tiyisekise leswaku hi kuma mpfuno. Ndza nkhensa swinene. Hi kombela mi ya emahlweni no hi seketela no tlhela mi seketela yin’wana miganga.”