Matimba Makaringe a hlula maxangu hi ku tirhisa swinun’hweriso

NKOWANKOWA – Matimba Makaringe, N’wamabindzu wo huma eLimpopo u le ku pfaleni ka xivandla exikarhi ka vafumi na swisiwana hi ku tirhisa Perfume tani hi xitirhisiwa xo hlohlotelo. Hambi leswi a langutaneke na swiphiqo swo hambana, Matimba i munhu wa xivino, u tirhisa bindzu ra yena ku hlohlotela vutomi bya vanhu emugangeni lowu a humaka ka wona hambi ku ri kwala tikweni-nkulu ra Afrika dzonga.

Riendzo ra ntombhi ya ka Makaringe ri sungurile eDorobeni ra Nkowa-nkowa, ehandle ka Tzaneen exifundzeni tsongo xa Mopane.Ku sukela hi 2017, u tirhile hi matimba ku vuyisela xindzhuti eka Vaaki va Afrika-Dzonga leswaku hambi ku ri vanhu lava holaka mali ya le hansi va ta kota ku xava swinun’hweriso swa xiyimo xa le henhla leswaku va ta nun’hwela no titwa kahle ku fana na van’wana vaaki.

Wansati loyi wa 33 wa Malembe hi vukhale u sungurile bindzu ra yena ro endla swinun’hweriso,naswona u ri thyile vito ra Courageous Cosmetics, endzhaku ko hisiwa hi mati yo vila notlhela a humeliwa hi khwirhi endzhaku ka tinhweti nyana.

N’waMabindzu Matimba Makaringe u vurile leswaku “Endzhaku ka maxangu lawa hamambirhi, ndzi vile na ku navela kumbe ntshembo wo xava swinun’hweriso leswi swi nga tani pfuna leswaku ndzi ta susa nun’hwelo wa ku hisiwa hi mati. Kambe a ndzi nga fikeleli kumbe kuswi kota ku swi xava swinun’hweriso sweswo”.

“Tanihi leswi a ndzi nga fikeleli ndzi teliwile hi miehleketo yo endle ndzavisiso hi swinun’hweriso leswi a ni swi dinga, kutani ndzi sungula ku swi endla hi ndzexe,” ku vula N’waMabindzu Matimba.

Matimba u fanela leswaku a tshama a ri karhi a dya marhambu ya hloko leswaku a ta kota ku hlayisa khwalithi ya swinun’hweriso swa yena, tanihi leswi a nga n’wamabindzu lontsongo.

N’wa Makaringe, u khutaza vaxavi va yena ku tlherisela mabodlhela ya vona lama nga riki na nchumu leswaku ma ta tlhela ya tirhisiwa ku chela swinun’hweriso swinwana.Hi ku tirhisa leswi, swi khumba mbango hi ndlela leyinene tanihi leswi a hlohlotelaku “Recycling”.

Loko swita ka ku aka vuxaka lebyinene na vaxavi vakwe, Matimba u tshova minxavo loko va xava hambi ku ri ku rhumela marungula ya ku navelela vaxavi vakwe masiku ya ku velekiwa ka vona, leswi swa nwi pfuna ku va na vaxavi vo tshembeka, hambi ku ri ku endla leswaku un’wana na un’wana a kota ku swi xava, swi nga khateleki xiyimo xa vona xa timali.

“Swa tsakisa loko munhu wo tirha tanihi mupfuni wa le kaya kumbe mutirhi wo aka a nghena exitolo xa wena ivi a xava swinun’hweriso [perfume], tanihi leswi na vona va lavaka perfume ya khwalithi ya kahle leswaku va ta nun’hwela kahle. Leswi swi vuyisela xindzhuti xa vona,” ku vula Matimba.

Bindzu ra Matimba ka karhi wa sweswi ra ha ntumbuluxile mitirho ya mune ya nkarhi hinkwawo, na kwalamo ka 25 wa vatirhi va sweswi kumbe vaxavisi naswona va kumeka etikweni hinkwaro.

Matimba u tlhela a va xivulavuri xa nsusumeto, MC, na mutsundzuxi wa mabindzu. U hlohlotela vanhu ku tikuma va huma eka ntshikilelo wa mianakanyo naswona u nyika nseketelo eka mabindzu lamatsongo. U tlhela a nyika matimba eka vanhwanyana lavatsongo na vavasati hi ku avelana vutivi bya yena eka ndlela yo sungula, ku kurisa, na ku kondletela mabindzu ya vona. Matimba i nhlohlotelo eka vavasati na vanhwanyana hinkwavo lava hundzaka eka minkarhi yo tika.

“Xitsundzuxo xa mina eka mani na mani loyi a hlanganaka na khombo i ku ti tlakula, u pfuxeta vutomi bya wena na ku kombela mpfuneto endleleni. Tirha eka vuhlayiseki bya wena bya miehleketo hi ku ya eka vutshunguri hikuva hi wena ntsena u nga tiponisa,” ku vula yena.

Endzhaku ka khume ra malembe, Matimba u na miehleketo ya ku ndlandlamuxa bindzu ra yena ku va xitolo xin’we xa swilo hinkwaswo leswi fambelanaka na ku endla swinun’hweriso loko a ri karhi a hangalasa eka malokixini hinkwawo ya Afrika-Dzonga.