Riendzo ra Muyimbeleri wa Gospel Msomi “Dwaro Rocks” Tshepo

Ntlawa wa Dwaro Rocks wu mirile timitsu eka vuyimbeleri bya gospel eAfrika-Dzonga, naswona ntlawa lowu wu nsimekiwile hi Msomi Eliazzar Tshepo. Msomi u velekiwile endyangwini wa Vukriste, vuyimbeleri a byi ri xiphemu xa ku kurisiwa ka yena naswona byi hoxe xandla swinene eku vumbeni ka riendzo ra yena ra vuyimbeleri. Namuntlha, i muyimbeleri wa ndhuma wa Gospel, mutsari wa tinsimu, na muhumelerisi, loyi a tirhisaka vuyimbeleri bya yena ku hlohlotela na ku tlakusa vaaki.

Vuyimbeleri bya Tshepo byi sungurile hi lembe ra 1982 loko a sungula ntlawa wa Dwaro Rocks na vafana van’wana va ntlhanu. Msomi u hlamusela leswaku, vafana lava va ntlhanu, U va dyondzise ndlela yo yimbelela ni ku tlanga swichayachayana swa vuyimbeleri. “ Hiri swin’we hi tumbuluxe vuyimbeleri lebyi khutazaka ni lebyi hlohlotelaka,” ku vula Msomi Eliazzar Tshepo.

Loko Msomi a ya emahlweni u vurile leswaku Vuyimbeleri bya vona byi koke rinoko eka vafambisi va xiyani moya xa SABC Munghana Lonene FM, leswi va pfuneke ku kuma ndhuma na ku fikelela vayingiseri vo tala.

Ku tinyiketela ka Msomi eka vutshila bya yena swi endle leswaku a tirha na muyimbeleri Roy Roy Ngobeni, loyi a rhekhodeke thepi ya ntlawa wa Dwaro Rocks yo sungula ya vuyimbeleri. Leswi akuri masungulo ya riendzo wa Msomi tani hi muyimbeleri wa Vuyimbeleri bya ximoya.

Eka malembe lawa ya hundzaka, ntlawa wa Dwaro Rocks wu khadziyisile tialibamu to hlaya ku katsa na “U nga chavi Nchumu”, “Yesu I Rirhandzu”, “Ta Matimba” na “Hansi ka Ngati” leti ti nga duma ngopfu eka varhandzi va vunanga bya Ximoya.

Msomi u vurile leswaku, “Vuyimbeleri bya Dwaro Rocks a hi bya vuhungasi ntsena, byi na nkucetelo no hlohlotela ku cinca eka vutomi bya vanhu. Ndzi lava leswaku loko vanhu va yingisela vuyimbeleri bya Dwaro Rocks va titwa va khutaziwa, va tlakusiwa ni ku hlohloteriwa leswaku va hundzuka hambi ku ri ku chaveleliwa”.

Ku tinyiketela ka Msomi eka vuyimbeleri swi n’wi endlile leswaku a xiximiwa hi masagwadi yo tala, ku katsa na masagwadi mambirhi ya Lifetime Achievement, masagwadi mambirhi ya Living Legend na masagwadi mambirhi ya Honored Doctorate Award – Doctor of Music na Doctor of Philosophy.

Kambe hakelo ya nkoka swinene eka Msomi i nkucetelo lowu vuyimbeleri bya Dwaro Rocks byi nga na wona eka vutomi bya vanhu, tanihi leswi ka karhi lowu vuyimbeleri byi hundzukeke bya vuhungasi ku tlula ku hlohlotela.

Msomi, u gimetile hi ku tsundzuxa vayimbeleri va vunanga bya Ximoya leswaku va fanele va rhanga va lava Xikwembu ku sungula na mfumo wa xona, kasi leswi n’wana va ta nyikiwa swona tanihi mihandzu.