Thekinoloji Yi Cinca Vutomi
Thekinoloji yi hoxa xandla swinene eku vumbeni ka vutomi bya hina bya siku na siku. Ku suka eka ndzawulo ya rihanyo ku ya eka ndzawulo ya dyondzo, na ku suka eka vuhlanganisi ku ya eka vutleketli, vutumbuluxi bya thekinoloji byi hundzula miganga ya hina na ku pfulela ndlela leyinene ya vumundzuku.
Ku ya hi Zanele Ngcobo, mutivi wa ndhuma wa Afrika-Dzonga eka thekinoloji u vula leswaku, ” Ku kuka eka thekinoloji swi na vuswikoti byo hlanganisa swivandla eka mfikelelo wa rihanyo eka miganga leyi nga kule swinene na tindzawulo ta rihanyu,”
“Loko ndzi nyika xikombiso eka mhaka leyi, Vavabyi lava va kumekaka kule na tindhawu leti vaongori kumbe madokodela va vona va nga ka tona va nga kota ku va bela tiqingho va kuma swiletelo swo karhi loko va nga se teka goza ra ku endzela tindhawu ta vutshunguri.” ku engeta Zanele Ngcobo.
Ngcobo u tlherile a kandziyisa matimba ya thekinoloji eka dyondzo, “Hi ku tirhisa tipulatifomo ta dyondzo ya xielekitironiki na switirhisiwa swa xidijitali, swichudeni swi nga fikelela swilo swa dyondzo nkarhi wihi na wihi na kun’wana na kun’wana, ku nga langutiwi ndhawu leyi swi nga.”
Nhluvuko wa thekinoloji wu tlhela wu hoxa xandla swinene eka vuhlanganisi, tanihi leswi wu endla ka leswaku miganga yi tshama yi ri chumu wun’we eka leswi swi khumbaka muganga walowo siku na siku.
Tipulatifomo ta swiyenge swa mabulu eka inthanete swi hundzuke switirhisiwa swa matimba swo avelana mahungu, ku hlela swiendlakalo swa vaaki, na ku kurisa ntirhisano wa swa matirhiselo ya vanhu.
Ndzawulo ya Vutleketli i sekithara yin’wana leyi Thekinoloji yi nga tisa ku cinca eka yona. Ngcobo u kombisile nkoka wa ti-Applications leti tirhisiwaka eka timhaka ta vutleketi, ku fana na ti-app to tanihi Bolt na Uber.” ti-app leti ti nyika vanhu matimba yo kota ku vitana mimovha endhawini leyi va nga ka yona karhi wihi na wihi ku tlula swifambo swa mani na mani,” ku vula Ngcobo.
Tipulatifomo leti ta Bolt na tin’wana, a ti hlayisi nkarhi ni mafurha ntsena kambe ti tlhela ti hoxa xandla swinene eka ximbakambakeni.
Thekinoloji yi hundzula miganga ya hina hi tindlela to tala, yi antswisa mfikelelo wa rihanyo, ku ndlandlamuxa dyondzo, ku hlanganisa vanhu, hambi ku ri ku antswisa vukorhokeri bya vutleketli.
Hilaha Zanele Ngcobo, a kombisaka hakona, ku amukela thekinoloji swi nga nyika matimba eka miganga na ku pfula tindlela leti nga pfunaka vumundzuku bya muganga. Hi ku amukela nhluvukiso lowu na ku tirhisa vuswikoti bya wona, miganga ya hina yi nga humelela, ku tiyisisa khwalithi ya vutomi byo antswa eka hinkwavo.
