Mfumo wa Limpopo wu simeka sisiteme leyintshwa yo thola

Hi Ntsakisi Gracia Chauke

Hofisi ya holobyenkulu exifundzheninkulu xa Limpopo yi simekile sisiteme leyintshwa ya ku thola ya elektroniki (e-Recruitment). Kasi leyi ko va ndlela ya ku antswisa maendlelo ya swikombelo swa mintirho. Endlelo leri ra xiyimo xale henhla ri tivisiwile hi siku ra ti 16 Khotavuxika 2024 exitediyamu xa khale xa Peter Mokaba ePolokwane hi nkarhi wa ku tlangela siku ra vantshwa.

Xikongomelonkulu xa pulatifomo ya e-Recruitment hi leswaku swikombelo swa mintirho swi fikeleleka hi ku olova. Swi ta pfumelela lava lavaka mintirho ku endla swikombelo va ri ekaya, leswi nga ta tlhela swi pfuneta ku tata swiphemu swa nkoka hi vahlawuriwa lava faneleke.

Ku cinca ka maendlelo ya swikombelo ku suka eka ndlela leyi tolovelekeke ya maphepha ku ya eka pulatifomo ya inthanete swi ta hlayisa mali na nkarhi wa lava nga ta endla swikombelo. Kasi sisiteme leyintshwa yi fambisana na xikongomelo xa mfumo xo tirhisa thekinoloji eka vukorhokeri byo antswa na matholele la ma nga erivaleni.

Ku engetela kwalaho, pulatifomo leyi yi tlhela yi seketela xiletelo xa vulawuri bya switirhisiwa swa vanhu na nhluvukiso wa vutshila bya vukorhokeri bya mfumo, leswi sunguleke hi n’hweti ya Dzivamisoko 2024.

Hi ku ya hi xitatimende lexi humesiweke hi hofisi ya holobyenkulu, sisiteme ya e-Recruitment yi ta ringetiwa ehofisini ya holobyenkulu ku sungula ivi yi ndlandlamuxiwa ku ya eka tindzawulo tin’wana ta xifundzankulu.

“Hambi leswi sisiteme yi nga eka inthanete, endlelo ra ntolovelo ra swikombelo swa maphepha ra ha ta amukeriwa ku endlela leswaku na lava nga riki na mfikelelo wa inthanete va kota ku endla swikombelo. Hambiswiritano, swikombelo swa inthanete swa khutaziwa ku hunguta mintila na ku hlayisa mali,” hi ku ya hi xitatimende.

Vaendli va swikombelo va ta kuma xitiyisekiso eka rhumelo rin’wana na rin’wana ra inthanete.