Meyara a andlala mbulavulo wa mpimanyeto wa timali

Share the News

Hi Ntsakisi Gracia Chauke

Meyara wa Masipala wa muganga wa Collins Chabane, Cllr. Shadrack Maluleke u andlale mbulavulo wa mpimanyeto wa timali eka tirho lowu tivekaka tani hi State of the Municipal Address, hi Ravuntlhanu wa ti 21 Khotavuxika 2024, eholweni ya vaaki ya Malamulele.

Maluleke u burisanile na vaaki na vakhomaxiave hi ku hambana hambana lava a va ri kona eholweni, laha anga andlala mpimanyeto wa lembe ximali 2024/2025 no tlhela a kombisa minhluvuko leyi endliweke eka lembe ximali le ri hundzeke na malembe ndhaku.

Ku engetela kwalaho, Maluleke u kombisile leswaku eka lembe ximali le ri hundzeke, tani hi masipala va kotile ku nyiketa tibasari eka 16 wa machudeni lawa ya paseke hi xiyimo xa le henhla no tlhela ya nyikiwa switirhisiwa swo fana na ‘laptop’, kasi va tlhele va hakela mali yo tsarisa ya tidyondzo ta le henhla eka machudeni ya 104 no basisa swikweleti swa tidyondzo eka machudeni ya 7.

Hambiswiritano, hi tlhelo ro tumbuluxa mintirho, meyara u vule leswaku va kotile ku thola 121 wa vatirhi va EPWP, 384 wa vatirhi lava thwaseleke tidyondzo ta le henhla eka nongonoko wa Youth Graduates xikan’we na 309 wa vatirhi vo basisa.

Maluleke u yile emahlweni a kombisa vukorhokeri lebyi va lulameleke ku byi endla tani hi masipala eka malembe ximali la ma taka ku suka eka 2024 kuya eka 2027. Swa ha te tano, mbulavulo wu kandziyisile ku tinyiketela lokukulu eka nhluvukiso wa switirhisiwa, leswi kongomisiweke eka ku antswisa khwalithi ya vutomi bya vaaki eka masipala hinkwawo.

Ku akiwa no lunghisiwa ka magondzo, ku nghenisiwa ka gezi, ku akiwa ka tisenthara ta mintlangu ta manyunyu na ku nghenisiwa ka mavoni ya switarata eka miganga yo hambana hambana hi swin’wana swa leswi nga ta rhangisiwa emahlweni.

Miganga yo fana na Muchipisi, Josefa, Miseve A, B, C, na D, Xihosana, Mukhomi, Jerome na Tshitombono hi yin’wana ya miganga leyi nga ta ngheniseriwa magondzo. Hi nkarhi wa mbulavulo, meyara u endlile xitiviso xa nkoka, laha a nga kombisa ntlhontlho wa nkayivelo wa mati eka miganga yo hlaya ya masipala.

“Va Basil Mabasa Foundation va nyikerile ‘borehole’ leyi nga na switirhisiwa hinkwaswo naswona yi ta nyikeriwa muganga wa Nkovani tani hi leswi ku nga wun’wana wa miganga leyi nga langutana na ntlhontlho wa nkayivelo wa mati. Hiku tirhisana na hofisi ya meyara, ‘borehole’ yita nyikeriwa ximfumo hi n’hweti ya Nelson Mandela,” ku vula meyara.

Meyara u khensile mufambisi xikan’we na vatirhi va masipala eka ku tinyiketela na mafambiselo lamanene.

“Swi ndzi nyika ntsako lowukulu ku lemuka ntirho wo hlamarisa lowu endliweke hi vatirhi va masipala eka lembe ximali leri nga eku kamberiweni. Ndzi tsakela ku hoyozela ntirho wa xiyimo xa le henhla, lowu rhangelaka hi mufambisi wa masipala loyi a tirhaka hi matimba no tinyiketela,” ku vula meyara.

Loko a gimeta, meyara u vule leswaku vuswikoti bya masipala byo nyika vukorhokeri byi vangiwa hi ku hlanganisiwa ka swilo leswi cinca-cincaka. Naswona I mbuyelo wa vuxaka bya ntirho wa xiphurofexinali lebyi tiyeke exikarhi ka swiphemu swa tipolitiki na vufambisi bya masipala.

 

 

 

 

 

 

 

 

 

 

 

 

 

Mathunse Hlukani

Hlukani Mathunse is a talented journalist and media professional with a passion for storytelling and community engagement.

Mathunse Hlukani has 381 posts and counting. See all posts by Mathunse Hlukani

Leave a Reply

Your email address will not be published. Required fields are marked *