Xisivela-mbeleko xi va emilon’weni
Hi Ntsakisi Gracia Chauke
Minkandziyiso ya sweswinyana leyi hangalakeke na swiyenge swa mabulo mayelana na leswaku ntlhavelo wo sivela mbeleko lowu tivekaka tanihi Depo-Provera wu nga vanga swirhumbana swa byongo na fukuzani yi endle leswaku vanhu vo tala va vilela naswona van’wana va ehleketa ni ku yimisa xisivela-mbeleko. Kambe i swa nkoka ku twisisa leswaku hambi leswi mirhi hinkwayo yingana switandzhaku swokarhi, ku chava loku nga kona mayelana na Depo-Provera kungava kungari xiphiqo lexikulu tanihi leswi swi vonakaka ha kona, hi ku ya hi vativi.
Xiviko ku suka eka The Guardian xi vulavule hi ndzavisiso lowu languteke vanhu lava tirhisaka Depo-Provera ni mintlhavelo yin’wana leyi fambelanaka na ku sivela mbeleko. Ndzavisiso lowu, lowu kandziyisiweke eka British Medical Journal hi Nyenyankulu nyan’waka, wu kume leswaku ku tirhisiwa nkarhi wo leha ka swisivela-mbeleko leswi sekeriweke eka progestogen, ku fana na Depo-Provera, swi nga engetela khombo ra muxaka wa swirhumbana leswi kumekaka ebyongweni leswi vuriwaka meningioma.
Kasi progestogen i homoni leyi nga lo endliwa leyi cisetelaka endlelo ra progesterone, homoni ya ntumbuluko leyi kumekaka eka rimbewu ra xisati.
Swirhumbana leswi swi vumbiwa eka tinyama leti rhendzeleke byongo naswona, minkarhi yo tala, a swi vangi fukuzani. Swikula hi ku nonoka naswona hi ntolovelo swi tshunguriwa hiku olova. Hambiswiritano, ndzavisiso lowu wu kume leswaku loko vanhu va tirhisa Depo-Provera ku tlula lembe, va va ka xiyimo xa le henhla xo khomiwa hi swirhumbana leswi.
Dokodela Jane Smith, mutivi wa swa rihanyo, u vule leswaku, “ndzavisiso lowu i wa nkoka naswona hi fanele hi wu veka tihlo, kambe khombo ra kuva vanhu va khomiwa hi vuvabyi lebyi wu le hansi swinene eka vanhu vo tala naswona a swi fanelanga kuva vanhu va khomiwa hi ku chava.
Ku vuriwa leswaku switlhela swi va na nkoka kutiva leswaku swirhumbana leswi vitaniwaka meningioma hi ntolovelo a swi na fukuzani. Vanhu vo tala lava nga ni vuvabyi bya meningioma a va na swona hambi ku ri swikombiso, naswona loko swi ri kona, hakanyingi vutshunguri bya tirha swinene. Vanhu votala lava tirhisaka Depo-Provera a va nge vi na swiphiqo nikatsongo. Entiyisweni, Depo-Provera i yin’wana ya mintlhavelo leyi hlayisekeke naswona yi nga duma eka vanhu votala hikuva yitirha swinene eka ku sivela mbeleko naswona yinga pfuneta eka timhaka tin’wana ta rihanyo.
Hi ku ya hi xitatimende lexi humaka eka American College of Obstetricians and Gynecologists (ACOG), ntlhavelo lowu wu tshama wu ri xivumbeko lexi hlayisekeke ni lexi tirhaka xa ku sivela mbeleko eka vanhu vo tala.
Dokodela Sarah Lin, mutivi wa rihanyo leri fambelanaka na mbeleko, u tsundzuxile leswaku, “hambileswi swi nga swa nkoka ku tshama munhu a kha a tiva vuxokoxoko, switlhela swi va swa nkoka leswaku munhu a nga chuwhi ku hinda mpimo. Eka vanhu vo tala, khombo ra meningioma leyi humaka eka Depo-Provera i ritsongo swinene hi ndlela ya ku a swi fanelanga ku va xivangelo xo tshika ku tirhisa endlelo leri ro sivela mbeleko loko munhu ri n’wu tirhela kahle.”
