Swigevenga swi tala na miganga ya Malamulele

Share the News

Hi Ntsakisi Gracia Chauke

Loko tiko ra Afrika Dzonga ri ya emahlweni ri lwisana na mintlhontlho ya vugevenga lebyi ya ka emahlweni byi andza hi rivilo ra le henhla swinene, miganga ehansi ka doroba ra Malamulele yi hundzuke ndhawu leyi tinsulavoya ti tlangelaka eka yona

Swiviko swa ku yiviwa ka timovha emigangeni yo hambana hambana eka Malamulele i matutu vana va tavasi. Vhiki a ri hundzi ku nga vikiwanga mhangu ya ku phanghiwa ka movha. Kasi loko kuri vutomi bya vaaki byona byi le ka nxungeto hikuva eka timhangu leti vikiwaka hi ku hambana hambana ka tona, ku tlhela ku va na swiviko swa ku hlaseriwa ka vinyi va timovha.

Swa ha te tano, eka mhangu ya sweswinyana leyi nga humelela emugangeni wa Jerome hi siku ra vu 6 khotavuxika 2024, kwalomu ka awara ya 21:00, muhlaseriwa wa xinuna wa malembe ya 63 hi vukhale a ri na munghana wa yena eka movha lowu a wu pakile, wa Toyota Hilux Double cab. Vaehleketeleriwa vanharhu lava a va hlomile hi swibalesa va humelerile kutani va va sindzisa ku huma emovheni no va kombetela hi swibalesa.

Ku hehliwa leswaku un’wana wa vaehleketeleriwa u hlasele muhlaseriwa kutani a ya emahlweni a n’wi balesela ku tlula kan’we emilengeni. Vaehleketeleriwa va yile emahlweni va secha muhlaseriwa kutani va teka tiqingho-nyonga na mali ya yena. Endzhaku ka sweswo, va chayele va famba ni movha wakwe.

Muvulavuleri wa maphorisa ya xifundzhankulu xa Limpopo, Colonel Malesela Ledwaba u vule leswaku endzhaku ka loko maphorisa ya lumiwile ndleve, va vukorhokeri bya swa vutshunguri bya xihatla va vitaniwile endhawini ya mhangu. Kasi muhlaseriwa u yisiwile exibedlhele, naswona nandzu wa ku phangha movha na ku ringeta ku dlaya wu pfuriwile.

“Ku hatle ku sunguriwa ku hlotiwa ka vaehleketeleriwa. Kasi movha lowu yiviweke wu kumiwile wu tshikiwile emugangeni wa Mukhomi ehandle nyana ka Malamulele,” ku hlamusela Ledwaba.

Hambiswiritano, Maphorisa ya ka Malamulele ya le ku yeni emahlweni na vulavisisi mayelana na vaehleketeleriwa.

Mathunse Hlukani

Hlukani Mathunse is a talented journalist and media professional with a passion for storytelling and community engagement.

Leave a Reply

Your email address will not be published. Required fields are marked *