Mubohiwa a tala na nhova
Hi Ntsakisi Gracia Chauke
Maphorisa ya xifundzhankulu xa Limpopo ya sungurile ku hlotana na Thembinkosi Gift Mabunda, mubohiwa wa malembe ya makume mbirhi mune hi vukhale loyi a rindzeleke ku tengisiwa loyi ku hehliwaka leswaku u balekile endzhaku ko ya ekhoto ya majisitarata ya Malamulele.
Kuya hi swiviko, Mabunda wo huma emugangeni wa Hasani Mbhalati u balekile hi Ravuntlhanu, 10 Sunguti 2025, kwalomu ka awara ya mbirhi na nhlekani. Hi nkarhi wa ku baleka, Mabunda a ri exikarhi ka vabohiwa va ntlhanu lava a va rindzele ku tengisiwa lava a va fanele ku khandziya lori leswaku va yisiwa ekhotsweni. Kambe Mabunda u swi kotile ku baleka a nga si nghena eka lori.
Sweswi maphorisa ya le ku lavisiseni ka swiyimo leswi rhendzeleke ndlela leyi ku baleka ku humeleleke ha yona. Mabunda a langutane na swihehlo swo hlaya swo tika, ku katsa na ku yiva movha, naswona sweswi u langutane na swihehlo swo engetela swo baleka ekhotsweni na ku pfuna vabohiwa van’wana ku baleka. Loko vulavisisi byi ya emahlweni, swihehlo swin’wana swi nga ha engeteriwa.
Khomixinara wa maphorisa wa xifundzhankulu xa Limpopo, Lieutenant General Thembi Hadebe, u lerisile maphorisa ku tirhisa switirhisiwa hinkwaswo leswi nga kona ku kuma Mabunda no n’wi vuyisa ekhotsweni.
Vaaki va miganga ya Malamulele va sale va hlamarile no karhatiwa hi mhangu leyi. Xirho xin’wana xa vaaki lexi karhatekeke xi vule leswaku, “Leyi i mhaka yo chavisa swinene. Maphorisa ya fanele ya tirha hi matimba ku vuyisa xigevenga lexi ekhotsweni xi nga si endla mintirho yin’wana ya vugevenga.”
Maphorisa ya kombela un’wana na un’wana loyi a nga va ka na vuxokoxoko bya laha Mabunda a nga kona ku ti vonakarisa no ti hlanganisa na xitichi xa maphorisa xa Malamulele, kumbe ku bela riqingho eka Crime Stop eka 08600 10111, kumbe ku tirhisa MySAPSApp ku vika mhaka yihi na yihi.
