Mpheni yi wela ehansi

Hi Orlando Chauke

Eka tinguva tinharhu leti nga hundza, Mpheni Home Defenders a ku ri xin’wana xa swipano swo tiya eka ligi ya ABC Motsepe. Va vile eka xiyimo xa le henhla va tlhela va yimela xifundzhankulu xa Limpopo eka ti “playoffs’ ta tiko. Hambiswiritano, sweswi va tsandzeka ku tlanga kahle ku fana ni le ku sunguleni. Xipano lexi xi langutane na mintlhontlho leyi nga endlaka leswaku xi wela ehansi swinene.

Mpheni Home Defenders yi langutane na ku tlhelela endzhaku kun’wana hi Mugqivela endzhaku ka loko yi tlange ku ringana hi 1-1 na Selwana White Vultures. Xipano lexi khale a xi vitaniwa Emanuel FC loko n’wini wa xona a nga si xi xavisela n’wamabindzu wo huma emugangeni wa Selwana ePhalaborwa. Leswi a swi nga va ku hlula ka nkoka swi hundzuke nkarhi lowu lahlekeke wo ya ehenhla eka ligi, leswi endleke leswaku swi tsotsomba swinene eka Mpheni ku tlhela yi kuma ndhawu ya yona ya le henhla.

Loko Mpheni yi ri karhi yi tsandzeka, swipano leswintshwa swi tlakukile tanihi vaphikizani vo tiya eka swidlodlo, leswi cinceke mphikizano eka ligi. Swipano swin’wana leswi khale a swi kayakaya eka mphikizano sweswi swi ya emahlweni. Munaca FC, leyi a yi kayakaya ku tshama eka ligi ya ABC Motsepe, sweswi yi tlakukile eka xiyimo xa vumbirhi. Hi nkarhi lowu fanaka, Musina United, leyi a yi ri ehansi ka ligi eka nguva leyi nga hundza, sweswi yi le ka xiyimo xa vumune.

Xivangelo xin’wana lexikulu xa ku cinca loku hi leswaku swipano swo tala sweswi swi ni mali yo tala yo antswisa vatlangi va swona. Khale, i swipano swi nga ri swingani ntsena leswi tiyeke leswi a swi tshama ehenhla hikuva a swi ri ni vatlangi vo antswa ni ntokoto wo tala. Kambe sweswi, swipano swo tala swi kuma vuseketeri naswona swi tirhisa mali yo tala eka vatlangi lavantshwa, va vazaberi, na nhluvukiso wa swipano hi ku angarhela. Hi mali yo tala na switirhisiwa, sweswi swipano swi nga

sayina vatlangi vo antswa, swi antswisa tindhawu ta swona to leteriwa, na ku tirhisa tindlela to tiya ta mintlangu. Leswi swi endle leswaku mphikizano lowu wu tika ku tlurisa. Hikwalaho ka sweswo, swipano leswi a swi kayakaya sweswi swi phikizana na swipano swa le henhla naswona swi cinca swiyimo swa ligi. Mpheni yi ta fanela ku endla ku cinca lokukulu leswaku yi tlhelela ehenhla. Swi nga ha lava leswaku yi sayina vatlangi lavantshwa, yi cinca tindlela ta yona to letela kumbe yi susumeta vatlangi va yona leswaku va tirha hi matimba. Loko yi nga antswisi, yi nga siyiwa endzhaku hi swipano leswintshwa leswi sweswi swi rhangelaka ligi.