Wanuna U Khomiwile Hi Ku Dlaya Swirho Swa Muti Swinharhu
Eka mhangu yo chavisa leyi siyeke vaaki va muganga wa Breda, eGilead, ehandle ka Mokopane, va ri na gome lerikulu, wanuna wa malembe ya 27 hi vukhale u khomiwile hikwalaho ko hehliwa hi ku dlaya manana wa yena, sesi wa yena na n’wana wa makwavo wa yena hi mbhanga.
Mhangu leyi yo chavisa yi humelerile hi Musumbhunuku, naswona yi rhumerile magandlati yo chavisa eka vaaki hambi ku ri maxaka.
Hi karhi lowu Mhangu leyi yo chavisa a yiri ku humeleleni, swirho swa vaaki swi lemukisile Maphorisa hi mhangu ya madzolonga ya le mindyangwini leyi humelelaka emutini wa vatwisiwa kuvava.
Kuya hi muvulavuleri wa maphorisa ya Xifundzhankulu eLimpopo, Colonel Malesela Ledwaba, n’wana wa mufana wa makume mbirhi nkombo (27) wa malembe hi vukhale, loyi vito ra yena ri nga se paluxiwaka, u hehliwa hi ku teka vutomi bya manana wa yena wa malembe ya makume ntlhanu nhungu (58).
“ Loko a heta ku dlaya manana wa yena, u landzile sesi wa yena wa malembe ya 19 hi vukhale na n’wana wa makwavo wa yena wa malembe ya khume a ya va dlaya na vona,” ku vula Muvulavuleri wa Maphorisa Ledwaba.
Maphorisa va hlamule hi ku hatlisa riqingho ra khombo kutani va khoma muehleketeleriwa loyi. Nsusumeto wa Mhangu leyi ya madzolonga a wu se tiveka ka karhi wa sweswi.
Ku lahlekeriwa hi vutomi byinharhu, ngopfu-ngopfu hi ndlela ya tihanyi swonghasi, swi siye vaaki va ri karhi va rhurhumela hi ku chava ni ku vilela.
Muehleketeleriwa u ta languteriwa ku ya ekhoto ya majistarata wa Mahwelereng hi Ravunharhu, laha a nga ta langutana na ntikelo wa vululami. U languteriwa ku hehliwa hi milandzu yinharhu yo dlaya.
Swiendlakalo swa madzolonga ya le mindyangwini swi ya emahlweni swi karhata vaaki va hina, hambi ku ri ku siya swivati leswi nga heriki eka mindyangu na miganga.
