Nkatsakanyo wo Angarhela wa Khonferense ya STEMI ePitori
Pretoria – Khonferense ya STEMI leyi a yi languteriwile swinene hi mahlo ngati yi humelerile eHodela ya ndhuma ya RH ePitori masungulweni mavhiki leringa hundza , naswona yi hlanganisile vativi, vatirhi va xiphurofexinali, na vanw’ana ku suka eka xiyenge xa sayense, thekinoloji, vunjhiniyara, tinhlayo, na vutumbuluxi.
Nhlengeletano leyi yi teke masiku manharhu naswona yi vile na swivulavuri swo xiximeka leswinga avelana vutivi bya swona bya nkoka na vutshila na lava a va ri kona.
Xandla xa holobye wa dyondzo ya le henhla ya sayense na vutumbuluxi Buti Manamela hi yena a nga pfula khomferense ya STEMI ximfumo.
Profesa Tebogo Mashifana, Dokodela Nehemiah Latolla na Profesa Singh Shawren a kuri vona swivulavuri swa nkoka naswona a va nyika mbulavulo wa vona hi masiku yo hambana.
Profesa Tebogo Mashifana, ku suka eYunivhesiti ya Joni, u nyikile mbulavulo wa xiyimo xa le henhla swinene leswi swinga endla leswaku swirho leswi swinga landzela swi tlakusa thoni ya Khonferense.
Mbulavulo ya yena awu kongomile eka nhlokomhaka ya maqhinga lawa swiyenge swa dyondzo ya swikolo swa masungulo na swa le henhla swi faneleke ku ma tirhisa ku hlomisa vadyondzi va le xikolweni xa le hansi na xa le henhla hi vuswikoti bya seyense.
Profesa Mashifana u kandziyisile nkoka wo tirhisa tidyondzo ta STEMI ku lulamisa mintlhontlho ya rixaka leyi tshikilelaka, kufana na ku ntumbuluxa thekinoloji leyi yi nga ta hunguta swiphiqo swa tiko ra hina.
“Tani hi tiko hi fanele ku yima nyana loko swita ka ku kopela switirhisiwa swa le handle loko swita ka thekinoloji tanihi leswi hi nga riku na swiphiqo swofana,” ku vula profesa Tebogo Mashifana.
Hi Siku ra Vumbirhi Dokodela Nehemiah Latolla ku suka eYunivhesiti ya Nelson Mandela u nyikile Nkanelo wa yena lowu kokaka rinoko naswona a wu vulavula hi mahanyelo na switandzhaku swa nkarhi lowu taka swa thekinoloji, leswi pfuxeke mabulo exikarhi ka lava a va ri kona.
Vutshila bya Dokodela Latolla byi nyikile nkongomiso wa nkoka eka vatekaxiave, byi va khutaza ku amukela vutumbuluxi na ku pfumelelana na xiyimo xa thekinoloji lexi cincaka hi xihatla emisaveni hikwayo.
Siku ro hetelela ra Khonferense ya STEMI ri vile na Profesa Singh Shawren, mupfuni wa profesa exikolweni xa khomphyuta eYunivhesiti ya Afrika-Dzonga [UNISA].
Profesa Shawren u kandziyisile nkoka wo nyika matimba eka miganga. Mbulavo wa yena a wu kongomisiwile eka tindlela ta vutumbuluxi to dyondzisa dyondzol swiyenge leswi swi welaka eka katsaka STEMI, na xilaveko xo nyika matimba eka swichudeni ku va swi tlhantlha swiphiqo swo hambana hambana.
Khonferense ya STEMI leyi yi nyikile pulatifomo eka vativi na lava tsakelaka ku cincana vutivi, na miehleketo loko swita ka thekinoloji.
Swivulavuri-nkulu swa nhlengeletano leyi, Profesa Tebogo Mashifana, Dokodela Nehemiah Latolla na Profesa Singh Shawren, va nyikele mimbavulo yo khomeka, leswi siyeke nkucetelo lowu nene eka lava a va ri xiave xa ntirho lowu.
