Mugodi wu languteriwa ku pfuxetiwa

 

 

Hi Ntsakisi Gracia Chauke

Eka nhlengeletano ya nkoka leyi khomiweke hi ti 3 Ndzati 2024, meyara wa masipala wa muganga wa Collins Chabane, Cllr. Shadrack Maluleke u hlanganile na huvo ya vukosi bya Madonsi na vayimeri ku suka eka tikhamphani ta migodi ku burisana hi ku pfuriwa nakambe ka mugodi wa Madonsi loku languteriweke hi mahlo ngati.

Nhlengeletano leyi yi funghe goza ra nkoka ro ya emahlweni eka makungu ya masipala ya ku pfuxeta ikhonomi, hi vuswikoti byo tisa ku tumbuluxiwa ka mitirho lokukulu na nhluvukiso wa vaaki.

Hi nkarhi wa mimbulavurisano, meyara u kandziyisile xiave xa nkoka lexi bindzu ra migodi ri nga xi endleka eka ikhonomi ya doraba ra Malamulele. “Ku pfula mugodi lowu nakambe a hi ku humesa swicelwa ntsena, kambe i ku pfuxeta vaaki va hina na ku tumbuluxa swivandlanene leswi nga ta tshama nkarhi wo leha eka vantshwa va hina,” ku vula meyara Maluleke.

“Kungu leri a ri nge vuyerisi vaaki va muganga wa Madonsi ntsena, kambe ri ta nyika vaaki hinkwavo va Collins Chabane ndzetelo wa vuswikoti lebyi fambelanaka na migodi, ku katsa mintirho hi ku hambana hambana na nhluvukiso wa vaaki, leswi fambisanaka na xivono xa masipala xo lava ku tumbuluxa ikhonomi ya laha kaya leyi tiyeke na leyi nga ta tshama nkarhi wo leha hi 2030”, ku engetela Maluleke.

Meyara u gimetile nhlengeletano hi ku tiyisisa ku tinyiketela ka yena eka phurosese leyi nga erivaleni leyi vuyerisaka vakhomaxiave hinkwavo ku katsa na vaaki va masipala wa muganga wa Collins Chabane.

Kasi tikhamphani leti nga va xiphemu xa nhlengeletano ti katsa Triangle City Mining, Dorto LTD, MLG Global Mining, Lesiego Industries, na Maphaha Mining Fisher.