Mudyuhari a rindzela RDP
Hi Orlando Chauke
Wanuna wa 75 wa malembe hi vukhale wo huma emugangeni wa Gandlanani ka-Khani eGiyani u boheke ku tiyisela swiyimo swo tika leswi tisiweke hi timpfula ta sweswinyana tanihi leswi a tshamaka eka yindlu ya byanyi leyi pfutaka naswona yi nga hlakala. Leswi swi ta endzhaku ka loko ku vikiwa leswaku u honisiwile tanihi muvuyeriwa wa yindlu ya RDP hi lava nga na vutihlamuleri byo avela tindlu ta RDP eka Masipala wa Greater Giyani.
Hambi leswi a nga na malembe na swiyimo leswi nga sirhelelekangiki, wanuna loyi, Boy Richard Mabunda, u ya emahlweni a hanya eka swiyimo leswi nga nyawuriki na nsati wa yena, leswi kombisaka xilaveko lexikulu xa ku nghenelela na vutihlamuleri eka endlelo ro avela ku tiyisisa leswaku vanhu lava faneleke swinene va rhangisiwa emahlweni.
Lava nga kusuhi na Mabunda va hehla leswaku masipala wa ha ku aka tindlu ta RDP emugangeni luwa kambe wu tsandzekile ku n’wi avela yin’we, hambi leswi xiyimo xa yena xi nga tshamisekangiki. “Endzhaku ko swi vona leswaku ku akiwile tindlu ta RDP ta vanhu van’wana lava pfumalaka emugangeni luwa handle ka Mabunda, ndzi ye eka masipala na yena ku ya vutisa leswaku hikokwalaho ka yini a nga averiwanga,” ku hlamusela ntukulu wa yena, Nzama Thomas Ngobeni.
Ngobeni u hlamusele leswaku loko va endzela masipala, va hlangane na munhu loyi a vitaniwaka Rikhotso, loyi ku hehliwaka leswaku u va tivise leswaku vito ra Mabunda a ri kona eka nxaxamelo wa vavuyeriwa. “Ndzi hlamarile loko hi byeriwa leswi hikuva van’wana va lava va ha ku kumaka tindlu ta RDP eka wadi 8 a va le ka xiyimo xo tika ngopfu fana na kokwana wa mina,” ku vula yena.
Loko a vutisiwa hi mhaka leyi, muvulavuleri wa masipala Steve Mavunda u tiyisisile leswaku hakunene tindlu ti akiwile sweswinyana. U hlamuserile leswaku Ndzawulo ya CoGHSTA yi nyikile 35 wa tindlu leswaku ti ta akiwa emugangeni lowu.
Hambiswiritano, ku fikela sweswi masipala wu hetile ntsena 29 wa tindlu ta RDP, laha 6 leti saleke ta ha yimeleke ku akiwa. “Nkulukumba Mabunda u le ka nxaxamelo wa tindlu ta tsevu leti saleke leti nga ta akiwa eka ndhawu liya;” ku vula muvulavuleri wa masipala, a tiyisisa leswaku yindlu ya Mabunda yi ta akiwa ku nga ri khale.
Hambiswiritano, ntukulu wakwe a nga khorwisekanga. U hehla masipala hi ku hemba mayelana na leswaku kokwana wa yena a ri eka nxaxamelo wa vavuyeriwa. “Leswi i mavunwa lama nga erivaleni. Xana mukhanselara wa wadi na swirho swa komiti ya wadi hinkwaswo swi nga vula njhani leswaku kokwana wa mina a nga kona eka nxaxamelo, ivi hi xitshuketa masipala wu vula leswaku u kona?” u kanetile, a sindzisa leswaku leyi i ndlela ya masipala yo papalata ku byarha vutihlamuleri.
